Almatyda «Creative Central Asia – 2023» Ortalyq Azıanyń kreatıvti ındýstrıalarynyń jyl saıynǵy forýmy ótti. Úsh kúnge sozylǵan «SSA-2023» dıalog alańy ózimizdiń Qazaqstan men Reseı, Qyrǵyzstan, Ózbekstan, Tájikstan jáne Ońtústik Koreıa memleketterin qosqanda, 100-den astam sarapshy-spıker men sala ókilderiniń basyn qosty.
Forýmǵa qatysýshylar Ortalyq Azıa óńirindegi kreatıvti ındýstrıalardy damytýdyń negizgi úrdisteri men perspektıvalyq joldaryn talqylady. Spıkerler negizginen kıno, mýzyka, bilim berý, fashion-ındýstrıa jáne IT-sektor salalary boıynsha pikir almasty.
Forým aıasynda «Kreatıvti ındýstrıalar jastarǵa arnalǵan áleýmettik lıft retinde», «Qalalyq jaıly orta jáne kreatıvti landshaftty damytý», «Áıelderdiń kreatıvti kásipkerligi», «Qazirgi álemdegi aýdıkontent» jáne taǵy basqa da taqyryptar sheńberinde birqatar paneldik sesıalar uıymdastyryldy.
– «SSA-2023» forýmynyń negizgi maqsaty – kreatıvti ındýstrıalardyń ınfraqurylymyn damytý, kreatıvti kásipkerlik ıdeıalaryn nasıhattaý, halyqaralyq ınvestısıalardy tartý. Forým Almaty qalasynyń brendin ilgeriletýge, shyǵarmashylyq mamandardy qoldaýǵa jáne ınovasıalyq jáne shyǵarmashylyq sektorlarda jańa ónimder jasaý úshin beıinaralyq yntymaqtastyqty damytýǵa yqpal etýge arnalǵan», – dedi Almaty qalasy Kásipkerlik jáne ınvestısıalar basqarmasynyń basshysy Berik Soltanbekov.
Al Halyqaralyq kreatıvti ındýstrıalar forýmynyń sáýletshisi Dına Ábdirahmet:
– Bul oraıda men bilim berý salasyndaǵy kreatıvti ındýstrıalar boıynsha óte belsendi jumystar júrgizilip jatqanyn atap ótkim keledi. Jańa magıstrlik baǵdarlamalar engizilýde. Iá, óńirler kreatıvti ındýstrıalarǵa, kreatıvti ekonomıkaǵa nazar aýdara bastady. Bul úlken jetistik. Halyqaralyq forýmda Almatynyń elimizdiń kreatıvti ındýstrıa ortalyǵy retinde engizgen úzdik keısterimen bólisti, – dedi.
«SSA-2023» forýmynyń mártebesin taqyryptyq dárister, «sheberlik synyptary», public talk, qoldanbaly óner jármeńkesi arttyrdy. Lumiere hall mýltımedıalyq murajaıynyń elge tanymal Almaty kýratorlarynyń qoldaýymen jáne tikeleı qatysýymen qazaqstandyq jáne halyqaralyq sıfrlyq sýretshilerdiń ınovasıalyq jáne eksperımenttik jumystaryn tanystyratyn kórme-ınstallásıasy da kóptiń yqylasyna bólendi. Kórmede AI-ART, Digital Fashion, Media Art baǵyttaryndaǵy avtorlardyń erekshe jumystary usynyldy.
İs-shara barysynda BUUDB-nyń jastar jáne kreatıvti ındýstrıalardyń shaǵyn orta bıznes ókilderimen saraptamalyq talqylaýy ótti. Forýmnyń mańyzdy oqıǵasy retinde qazaqstandyq dızaınerdiń fashion musical «Luna Sezim» jumysy erekshe atap ótildi.