QR Premer-Mınıstriniń orynbasary Tamara Dúısenovanyń tóraǵalyǵymen ótken keńeste balalar qaýipsizdigin qamtamasyz etý jáne býllıngke qarsy sharalar jaıy talqylandy. Oǵan salalyq mınıstrlikter ókilderi, oblys ákimderiniń jaýapty orynbasarlary jáne Balalar quqyǵy jónindegi ýákil qatysty.
Elimizde zorlyq-zombylyq jáne býllıngten japa shekkenderge kómek berý jónindegi keshendi baǵdarlama ázirlenip jatyr. Múddeli memlekettik organdar, ǵalymdar, qoǵam belsendileri men sarapshylardan turatyn jumys toby bul baǵytta elde atqarylyp jatqan jumystarmen qatar, halyqaralyq tájirıbeni de zerttegen.
Býllıngke ushyraǵan nemese kýá bolǵandardy anyqtaý men olarǵa qoldaý kórsetý ádistemesi qabyldanǵan. 111 nómiri boıynsha baılanys ortalyǵy jumys isteýde. Ádistemege sáıkes mamandar qysym jasaǵan tarappen de, býllıngke ushyraǵan jaqpen de jumys jasaıdy. Budan bólek «Nazarbaev Zıatkerlik mektepterimen» birlestikte Fınlándıada oń nátıje kórsetken KiVa baǵdarlamasyn pılottyq rejımde júzege asyrý kózdelgen.
«Alǵashqy kezeńde elde 100-den astam mektep tańdalyp, tıisti sharalar kestesi ázirlengen. Ádisteme mazmuny beıimdelip, mamandar oqytylyp jatyr. Pılot aldaǵy oqý jylynan bastap júzege asyrylatyn bolady. Synyp saǵattarynyń taqyryptary belgilendi. Eger baǵdarlama nátıjeli bolsa, tájirıbe ózge bilim oshaqtaryna taratylatyn bolady», — dedi «Nazarbaev Zıatkerlik mektepteri» DBBU basqarma tóraǵasy Ánýar Janǵozın.
Býllıngke qarsy sharalar aıasynda óńirlik psıhologıalyq qoldaý ortalyqtarynyń qataryn kóbeıtip, jumysyn kúsheıtý maqsaty qoıyldy. Krızıstik jaǵdaıda demeý bolar mekemeler eldiń barlyq aımaǵynda ashylýy kerek. Oqý-aǵartý vıse-mınıstri Edil Ospan keltirgen derekke saı oblystar bul jumysty maýsym aıyna deıin aıaqtaıdy. Osy rette jergilikti ákimdikterge bekitilgen kestege saı uıymdastyrý sharalaryn qolǵa alyp, ortalyqtardyń tıisti jabdyqtalýyn qadaǵalaý tapsyryldy.
«Zorlyq-zombylyq pen býllıngten japa shekkenderge qoldaý kórsetý kabınetteri men ortalyqtardyń jumysy mańyzdy. KiVa baǵdarlamasyn pılottyq rejımde júzege asyrý úshin qajetti sharalardy qolǵa alýdy tapsyramyn. Oǵan qatysatyn bilim oshaqtaryn tańdaý krıterıılerin muqıat qarastyrý qajet. Bul jumys eki apta ishinde atqarylýy shart. Tańdalǵan mekteptermen shektelmeı, “Nazarbaev zıatkerlik mektepteri” bazasynda tıisti ustazdardy oqytý jaǵyn qatar qarastyrǵan jón. Buǵan múddeli memlekettik organdarmen qatar, oblys ákimdikteri birlese aralasýy qajet», — dedi Tamara Dúısenova.