Premer-mınıstrdiń birinshi orynbasary Roman Sklár Astanada qurylys jumysy júrgizilip jatqan birqatar sport nysanyn aralady, dep habarlady Úkimettiń baspasóz qyzmeti, dep habarlaıdy almaty-akshamy.kz
Ol Týrızm jáne sport mınıstri Ermek Marjyqpaev, Astana qalasynyń ákimi Jeńis Qasymbek jáne máslıhat tóraǵasy Maslan Kanalımovpen birge aldymen qurylysy júrip jatqan Ulttyq sport ýnıversıtetinde boldy. Ony 2025 jyly aıaqtaý josparlanǵan. JOO-ny iske qosý kadrlardy daıarlaýdan bastap, sporttaǵy úlken jetistikterge de yqpal etedi.
Sonymen qatar V Dúnıejúzilik kóshpendiler oıyndaryna daıyndyq aıasyndaǵy sport nysandaryna bardy.
Sondaı-aq premer-mınıstrdiń birinshi orynbasary sport nysandarynyń ınfraqurylymyn daıyndaý, kirme joldardy qamtamasyz etetin negizgi magıstraldardy jóndeý jáne is-sharalar ótkiziletin aýmaqtardy abattandyrý jumystarynan habardar etildi, - delingen habarlamada.
Buǵan «Qazanat» ıpodromyn, oǵan kireberis joldy keńeıtý, trıbýnalardy kúrdeli jóndeý, at qoralar salý, kókpar alańdary jáne t.b. kiredi. Sondaı-aq «Astana-Arena», «Alaý» jáne «Barys Arena» muz saraılarynyń irgeles aýmaqtaryn keshendi abattandyrý jumysy tekserildi.
Aıta keteri, Dúnıejúzilik kóshpendiler oıyndary Ulttyq mýzeı, Úshkempirov atyndaǵy jekpe-jek saraıy, «Dýman» qonaq úıi jáne «Qazaqstan» jeńil atletıka sport kesheni aýmaǵynda ótedi.