Qazirgi tańda álemdik bilim keńistigine kirgen otandyq bilim berý salasynda kóptegen ıgi ózgerister júzege asýda. Qazaqstandyq oqýshylar halyqaralyq saıystarda ózderiniń joǵary bilim deńgeıimen bıik tuǵyrlardan úzdiksiz kórinip, memleket tarapynan jasóspirimder men olardyń jetekshileriniń eńbegi baǵalanyp jatyr. Sonymen qatar PISA, TIMSS sıaqty halyqaralyq oqýshy qabiletin baǵalaý baǵdarlamalary boıynsha alǵashqy jyldarmen salystyrǵanda joǵary kórsetkishterge ıe bolýda. Elimizdiń jalpy orta bilim berý uıymdarynyń qyzmetkerleri biliktilikti arttyrý kýrstarynan ótip, álemdik bilim berý júıesiniń ozyq tájirıbelerimen tanysýda. Qazirgi ýaqytta bilim berý salasynda úzdik jetistikterge jetip, ózindik oqytý júıesin qalyptastyrǵan memleketterdiń qatarynda Sıngapýr bar. «Azıa barysy» dep atalǵan memlekettiń mektepteri az ýaqyttyń ishinde álem úzdikteri qataryna engen. 2023 jyldyń shildesinde Sıngapýrde ótken taǵylymdamalyq issaparda Almaty qalasy Bostandyq aýdany M.Gandı atyndaǵy №92 mamandandyrylǵan lıseıdiń dırektory Kúljan Saýytqyzy Shajabaeva boldy. Úzdik tájirıbemen tanysqan mektep basshysy Qazaqstanǵa oralǵan soń birneshe semınar ótkizdi.
Eń aldymen, mektep basshysy №92 mamandandyrylǵan lıseı ujymyn taǵylymdamalyq issapar qorytyndylarymen tanystyrdy. «Sıngapýr eliniń bilim júıesindegi negizgi erekshelikteri neden baıqalady?» taqyrybyndaǵy prezentasıasy arqyly bilim salasynda tolaǵaı tabystarǵa jetken eldiń oqytý júıesine sholý jasady.
Sóıtip, lıseı qabyrǵasynda júrgizilgen teorıalyq jáne praktıkalyq jumystardan soń tájirıbe bólisý maqsatynda aýdandyq jáne qalalyq deńgeıde birneshe semınar ótkizildi. 2023 jyldyń 20 jeltoqsanynda «Almaty mektepteri: Mektepten tys oqytý – bilim kózin keńeıtý» atty qalalyq semınar ótkizildi. Qala pedagogterine arnalǵan is-sharanyń maqsaty – lıseıdiń mektepishilik baqylaý júrgizý baǵytyndaǵy jumystary men elektrondy qujattar júıesimen tanystyryp, tájirıbe almasý.
Sondaı-aq lıseı dırektory K.S.Shajabaeva «Almaty mektepteri» jobasy aıasynda Sıngapýr memleketinde ótken taǵylymdamalyq issapardyń nátıjelerimen bólisti. Sıngapýr mektepteriniń bilim berý tujyrymdamalary men oqytý baǵdarlamalary, orta bilim berý uıymdarynyń tájirıbelerin eskere otyryp, ár pán boıynsha oqytýdy uıymdastyrýdyń formalaryn (mekteptegi sabaq, tabıǵatty baqylaý sabaǵy, saıahat sabaq, zerthanalyq sabaq, joba qorǵaý sabaǵy, oza oqytý sabaǵy, óndiristik sabaq, mýzeı sabaǵy, teatr sabaǵy t.b.) túrlendirý arqyly balalardyń naqty taqyryp boıynsha bilim alýynyń túrli kózderi men múmkindikterin keńeıtý maqsatynda lıseıde júrgizilgen «Mektepten tys oqytý – bilim kózin keńeıtý» joba jumysymen tanystyrdy. Semınar aıasynda dástúrli emes formatta ótkizilgen birneshe sabaq tanystyryldy.
Semınarǵa qatysýshylar Sıngapýrdyń bilim júıesiniń ozyq tájirıbesimen ushtasqan lıseıdiń joba jumystarymen tanysty jáne mektepishilik baqylaý jumystary boıynsha qundy aqparat aldy.
Odan bólek, «Mektepten tys oqytý – bilim kózin keńeıtý» jobasy aıasynda aýdan kitaphanashylary úshin semınar ótkizildi. Mektep dırektory Kúljan Saýytqyzy Sıngapýr mektepterindegi kitaphanalardyń jumysymen tanystyrdy. Kitaphanalarda kitaptardan basqa túrli oıynshyqtar, ertegi keıipkerleri bar. Balalarǵa sabaq aıaqtalǵan soń birneshe saǵattaryn kitaphanada ótkizýge jaǵdaı jasalǵan. Balalardyń oqý saýattylyǵyn arttyrýda ata-analar mańyzdy ról atqarady. Kitaphanashylar ata-analarǵa arnalǵan «Oqý qyzyqty: qazir basta!» taqyrybynda semınarlar ótkizedi. Bul ıgi dástúr lıseı qabyrǵasynda da júrgizilýde. Uly oıshyl Abaı Qunanbaıulynyń: «Artyq ǵylym – kitapta, erinbeı oqyp kórýge» degen danalyǵynyń negizinde mektepte «Oqýǵa qushtar mektep» jobasy júzege asyrylyp jatyr. Lıseı oqýshylary «Balalar oqýy», «Abaı oqýlary», «Maǵjan oqýlary», «Muqaǵalı oqýlary», «Aıbergenov oqýlary» t.b. shyǵarmashylyq baıqaýlarynda júldeli oryndarǵa ıe boldy.
M.Gandı atyndaǵy №92 mamandandyrylǵan lıseıde «Mektepten tys oqytý – bilim kózin keńeıtý» taqyrybyndaǵy joba jumysy jalǵasýda. Aldaǵy ýaqytta lıseı oqýshylarymen júrgiziletin dástúrli emes formattaǵy sabaqtardyń sany artady dep josparlanyp otyr. Sonymen qatar bilim alýshylardyń zertteýshilik jáne shyǵarmashylyq baǵyttaǵy jumystary da óziniń jalǵasyn tabady. Eń bastysy, mektep ujymynyń ár múshesi, Ábý Nasyr ál-Farabı aıtqandaı, ustaz tarapynan ár iste barynsha yntalylyq pen tabandylyq qajet ekenin túsinedi.