Tıisti sheshim búgin Almaty qalasy polısıa departamenti Tálimgerler keńesiniń birinshi otyrysynda qabyldandy.
Qazaqstan Respýblıkasynyń İshki ister mınıstri Erjan Sadenovtiń nusqaýyna sáıkes 2024 jyl kadr sapasyn jaqsartý jyly dep belgilendi jáne ardagerler tarapynan jeke qurammen tálim-tárbıe jumystaryn kóterý máselelerin qozǵady, dep habarlaıdy Almaty-akshamy.kz Polisia.kz-ke silteme jasap.
«Urpaq tárbıesi – ult bolashaǵynyń kepili” degen el ishindegi ulaǵatty sózdi eske alyp, ishki ister organdarynyń damýy jolynda ardagerlerdiń aqyl-keńesteri jáne oı-pikirleri búgingi tańda óte mańyzdy ekenin atap ótkim keledi. Sizderdiń qoldaýlaryńyzdyń arqasynda jáne búgingi kezdesýdiń nátıjesinde ardagerlerimizdiń árbir ónegeli sózi, taǵylymdy eńbekteri – keıingi jastarǵa úlken úlgi jáne tálim-tárbıe. Sondyqtan sizderge degen úmitimiz de, qurmetimiz de erekshe», – dedi Almaty qalasy polısıa departamentiniń bastyǵy Arystanǵanı Zapparov.
Ashyq daýys berý nátıjesinde Moldıar Orazalıev Almaty PD Tálimgerler keńesiniń tóraǵasy boldy. Onyń orynbasary – Jan Kenjetaev. Keńestiń sheshimimen 11 ardager, QR İİM-niń eńbek sińirgen qaıratkerleri Almaty polısıasynyń barlyq qyzmetteri men bólimsheleriniń kýratory bolyp taǵaıyndaldy.
«Qurmetti ardagerler! Memleket Táýelsizdiginiń jáne qazaq polısıasynyń qalyptasýynyń jolynda bárińizdiń eńbegińiz zor! Jańa formattaǵy polısıa qyzmetkerlerin otansúıgishtikke tárbıeleýde sizderdiń bilimderińiz, danalyqtaryńyz jáne ómirlik tájirıbelerińiz búginde burynǵydan da mańyzdy. Ardagerlerdiń keńesteri qazirgi qyzmetkerler men bolashaq basshylar úshin baǵa jetpes. Biz mundaı kezdesýlerdi dástúrge aınaldyrýdy josparlap otyrmyz jáne bul oń nátıje beretinine senimdimin. Búgingi kezdesýdiń basty mindeti – tájirıbe almasý, polısıa qyzmetkerleriniń tárbıesine qatysty máselelerdi talqylaý jáne eń bastysy departamenttiń Tálimgerler keńesin qurý», – dedi Arystanǵanı Zapparov.
Almaty qalalyq polısıa departamenti – alty jarym myńǵa jýyq qyzmetkeri bar Qazaqstan Respýblıkasy İshki ister mınıstrliginiń eń iri bólimshesi. Almaty polısıasy óziniń qalyptasýynyń búkil tarıhynda laıyqty kóshbasshylardy daıyndady. Almaty PD 4 mınıstrmen, 16 ishki ister mınıstriniń orynbasarymen jáne 30 joǵary general ataǵyn alǵan basshylarmen maqtanady.