Almaty qalasynyń Ortalyq mádenıet jáne demalys saıabaǵynda ata-ana qamqorlyǵynsyz qalǵan balalarǵa arnalǵan «Shattyq sherýi» atty úlken mereke ótti.
Atalǵan sharany ál-Farabı atyndaǵy Qazaq ulttyq ýnıversıtetiniń ekonomıka jáne bıznes joǵary mektebiniń qarjy jáne esep kafedrasynyń oqytýshylary men stýdentteri, sondaı-aq Almaty velotrek uıymy birlesip uıymdastyrdy.
Merekege Almaty qalasyndaǵy №1 balalar úıi men Almaty oblystyq qıyn ómir jaǵdaıyndaǵy balalardy qoldaý ortalyǵynyń tárbıelenýshileri shaqyryldy. Barlyǵy 50-den astam bala qatysty. Balalarǵa arnap konserttik baǵdarlama, velojarys, fleshmobtar, oıyndar men pıknık uıymdastyryldy. Kún shýaǵynda ótken festıvál shyn máninde balalar úshin erekshe syılyq boldy.
Raıgúl DOSJAN, ál-Farabı atyndaǵy QazUÝ Ekonomıkalyq zertteýler ortalyǵynyń dırektory:
– Bul sharany biz osymen ekinshi ret ótkizip otyrmyz. Ýnıversıtet oqytýshylary men stýdentteri atsalysyp, balalarǵa kóterińki kóńil-kúı syılaýdy maqsat ettik. Sonymen qatar, mundaı sharalar jastarǵa áleýmettik jaýapkershilik pen qoǵamǵa paıdaly bolý sezimin uıalatady. Velotrek uıymynyń qoldaýymen velojarys uıymdastyrylyp, júldeger balalarǵa syılyqtar berildi. Konsertke oqytýshylar, stýdentter, ónerli otbasylar, blogerler men jas ánshiler qatysty. Atmosfera óte keremet, búgin ózi – án, bı, kúlki men shattyqqa toly kún boldy.
Merekelik keshte balalardyń ózderi de ónerlerin ortaǵa saldy. Máselen, balalar úıiniń 8-synyp oqýshysy Gúljaına Esenbaeva «Sarbazdar» ánin oryndap, kórermenderdiń ystyq yqylasyna bólendi. Sonymen qatar, kishkentaı ánshiler Inabat Kengakova men Aıarý Beısenbekova da sahnada óner kórsetti.
Lázzat JEKSEMBAEVA, arnaýly áleýmettik qyzmet kórsetý ortalyǵynyń tárbıeshisi:
– Bul balalar – ata-ananyń meıiriminen tys qalǵan jandar. Mundaı sharalar olardyń jan dúnıesine jylý syılaıdy. Balalar erekshe qýanyp júr. Án aıtyp, oınap, jańa dostar taýyp jatyr. Uıymdastyrýshylarǵa alǵysymyz sheksiz.
Sáýle Baıbalaqova, ortalyq tárbıeshisi:
– Osy salada 1994 jyldan beri jumys isteımin. Búgingi merekege 50-ge jýyq balany alyp keldik. Balalarymyz ónerli, jan-jaqty, talantty. Mysaly, Gúljaına – sabaǵy úzdik, alǵyr qyz. Bul mereke balalardyń kóńilin serpiltip, syılyqtarmen qýantty. Osyndaı sharalar kóbirek bolsa eken.
Tanymal blogerler Asqat Eralıev pen Jan İzbasar merekeni kóńildi júrgizip, balalarǵa ázil-qaljyńymen shattyq syılady.
«Shattyq sherýi» merekesi – meıirimdilik pen qamqorlyqtyń, naǵyz adamgershiliktiń kórinisi boldy. Kesh sońynda uıymdastyrýshylar balalarǵa arnap ystyq tamaq pen túrli baıqaýlar uıymdastyryp, jeńimpazdarǵa baǵaly syılyqtar tabystady.
