Bıyl 10 jyldyq mereıtoıyn atap ótken ARMaTÝRa festıvali Almatydaǵy «Mereı» saýda ortalyǵynyń alańynda etnoaýyl úlgisinde ótti. 
Bul joly shara sportty serik etkendermen qatar, ár jastaǵy qala turǵyndaryn toǵystyrǵan keń aýqymdy qoǵamdyq merekege aınaldy. Ulttyq oıyndar, qolóner sheberleriniń kórmesi, tanymdyq kezdesýler men sporttyq saıystar is-sharaǵa aıryqsha atmosfera men merekelik rýh syılady. ARMaTÝRa festıvaliniń negizin qalaýshy, armrestlıng sheberi Evgenıı Shamraıdyń aıtýynsha, bul bastama 2008 jyly bastalǵan. Alǵashqy chempıonat 2014 jyly uıymdastyrylyp, sodan beri jyl saıyn jastardy sportqa baýlýdy maqsat etken dástúrli sharaǵa aınaldy.
– Festıvalimizdiń jyl saıyn kópshilikti jınaıtyny qýantady. Bul joly baǵdarlamamyzdyetnıkalyq elementtermen tolyqtyrý – sátti sheshim boldy dep oılaımyn. Aldaǵy ýaqytta qazaqtyń ulttyq oıyndaryn da sporttyq merekeniń ajyramas bóligine aınaldyrýdy kózdep otyrmyz. Óıtkeni bizdiń mádenı muramyz baı, tańdaıtyn dúnıeler jetkilikti. Bul tek jarys emes, jastar úshin shabyt, óz kúshin synaýǵa múmkindik. Biz ınklúzıvti orta qalyptastyryp jatyrmyz, – deıdi Evgenıı Shamraı.
Festıvál baǵdarlamasy buryn-sońdy bolmaǵan mazmunmen erekshelendi: 13 sporttyq lokasıada týrnıkke tartylý, kir tasyn kóterý, qol kúresi, jattyǵýlar jasaý sekildi túrli jarystar uıymdastyryldy. Ár tapsyrmany oryndaǵan qatysýshy arnaıy sımvolıkalyq tıyndar jınap, olardy sý, baýyrsaq, t.b. taǵamdarǵa almastyryp máz-meıram boldy. 
Erekshe nazar aýdartqan «Petroglıfter kıiz úıi»kópshilikti qazaq tarıhymen tanystyryp, jas ǵalymdar men qolónershilerdi toǵystyrdy. Munda ulttyq stıldegi buıymdar, sheberler kórmesi, altybaqan, balalarǵa arnalǵan oıyn alańdary, etnofotoaımaq pen konserttik baǵdarlama usynyldy. Festıválge kelgen ár adam ózine laıyq is taýyp, qyzyqty ýaqyt ótkizdi.
Festıváldiń turaqty qatysýshysy, Almaty qalalyq Qoǵamdyq keńestiń múshesi Bogdan Djepka bul sharany teń múmkindikter qoǵamyn qurýdyń jarqyn úlgisi dep baǵalady:
– Munda eshkim shet qalmaıdy. Sport arqyly adamdar birigedi, jańa dostar tabady. Mundaı festıválder qalanyń ár aýdanynda ótýi kerek, – deıdi ol.
Sportshylardy tirkep, árbir sporttyq kezeńdi ádil baǵalaýǵa tyrysqan uıymdastyrýshylar toby jeńimpazdar men belsendi qatysýshylarǵa táttiler men syılyqtar úlestirdi.
– Bul – jastardy salaýatty ómir saltyna baýlýdyń tamasha tásili. Bizdiń maqsat – tek sportty nasıhattaý ǵana emes, sonymen birge kóterińki kóńil-kúı men adamdar arasyndaǵy jyly qarym-qatynasty qalyptastyrý, – deıdi qatysýshylardyń biri, almatylyq Berik Quralbaı.
Kıiz úıler, án men bıden shashý shashqan ónerpazdar, baýyrsaq pen ystyq shaı, balalardyń shat kúlkisi – barlyǵy qazaqtyń qonaqjaı mádenıeti men sporttyq rýhty tamasha ushtastyrdy. Uıymdastyrýshylar mereke sońynda qatysýshylarǵa Alǵys hattar men syılyqtar tabystady. Mereke kesh qaraıǵansha jalǵasty.
P.S: ARMaTÝRa festıvali – bul jaı ǵana jarys emes, ol – adamdardy jaqyndastyratyn, qoǵamdy biriktiretin úlken mereke. Mereıtoılyq shara bir kúnmen shektelmeı, júrekterde uzaq saqtalatyn áser qaldyrdy.