149 jyljymaly medısınalyq keshen aýyldarǵa shyǵyp jatyr.
Medısınalyq jyljymaly keshender elimizdiń 1,8 mln turǵynyn vaksınasıalady. Bul týraly Densaýlyq saqtaý mınıstrliginiń Medısınalyq kómekti uıymdastyrý departamenti dırektorynyń orynbasary Gúlnar Sársenbaeva aıtty, dep habarlaıdy Almaty-akshamy.kz QazAqparatqa silteme jasap.
«Elimizdiń densaýlyq saqtaý júıesi koronavırýs ınfeksıasymen baılanysty jahandyq ózgerister aıasynda kúrdeli aýyrtpalyqqa shydas berip, birshama sapaly ózgeristerdi bastan keshirdi. Máselen, medısınalyq-sanıtarlyq alǵashqy kómek uıymdary janynan shamamen 3 myń mobıldi brıgada quryldy. Olar koronavırýs ınfeksıasyn juqtyrǵan pasentterge kómek kórsetýde tıimdiligin kórsetti. Osy tájirıbe jetildirip, damytylyp jatyr. Búginde kóliktegi medısına shalǵaıdaǵy aýyldardyń turǵyndaryna medısınalyq kómekti qamtamasyz etip otyr. Atap aıtqanda, 149 jyljymaly medısınalyq keshen aýyldarǵa shyǵyp, halyqtyń maqsatty toptaryna skrınıngtik zertteýler júrgizedi. Beıindi mamandar keńes berý úshin qabyldaıdy», - dedi ol Ortalyq komýnıkasıalar qyzmetinde ótken dóńgelek ústel barysynda.
Onyń dereginshe, ótken jyly jyljymaly medısınalyq keshender halyqty vaksınasıalaý jumysyn júrgizdi. Shalǵaıdaǵy eldimekenderdiń shamamen 1,8 mln turǵynyna koronavırýs ınfeksıasyna qarsy ekpe jasady.
«Jyljymaly medısınalyq keshenderdiń jumys qorytyndysynda sozylmaly aýrýlary bar tulǵalar anyqtalyp, baqylaýǵa alyndy. Bıyl da keshender bekitilgen kestege saı jumys istep jatyr. Osy jylydń 1-toqsanynda 300 myńnan astam turǵyny bar 550 eldi mekenge qyzmet kórsetildi. 118 myń dıagnostıkalyq, 57 myńnan astam zerthanalyq zertteý jasaldy. Shamamen 16 myń naýqas anyqtalyp, onyń 3 myńǵa jýyǵy baqylaýǵa alyndy», - dedi Gúlnar Sársenbaeva.