Elordada medısına salasyndaǵy 19 memlekettik qyzmettiń arasynda 18-i avtomattandyrylǵan
Bul týraly qaladaǵy Qoǵamdyq densaýlyq saqtaý basqarmasynyń basshysy Tımýr Muratov málim etti, dep habarlaıdy Almaty-akshamy.kz QazAqparat-qa silteme jasap.
«Memlekettik qyzmetterdi elektrondy túrde júrgizý turǵysynda jaqsy jetistikter bar. 2022 jyldyń birinshi toqsanynyń qorytyndysy boıynsha 2 967 507 qyzmet kórsetilse, sonyń 361 584-i (12,2 paıyz) qaǵaz nusqada, al 2 605 923-i (87,8 paıyz) elektrondy tártipte atqaryldy. 2021 jyldyń osy kezeńimen salystyrǵanda, kórsetilgen qyzmetterdiń jalpy sany 14,2 paıyzǵa ósti. Osy oraıda elektrondy nusqadaǵy memlekettik qyzmet 11,6 paıyzǵa artqan», - dedi T. Muratov qala máslıhatynda ótken talqylaýlar kezinde.
Onyń aıtýynsha, 2022 jyldyń basynan beri basqarma qyzmetterdi kórsetý sapasyn memlekettik qadaǵalaý boıynsha jumystarǵa kiristi. Buǵan deıin osy qyzmet ákim apparatynyń quzyrynda boldy. Bekitilgen jospar boıynsha 12 uıymdy qamtý eskerilgen. Qazirgi kezde eki medısına uıymy tekserýden ótse, taǵy bireýinde tıisti is-sharalar júrgizilip jatyr.
«Anyqtalǵan kemshilikterdi túzetý boıynsha jumystardy jalǵastyryp jatyrmyz. Densaýlyq saqtaý salasyndaǵy memlekettik qyzmet kórsetý bóliginde ózekti máselelerdiń biri retinde alǵashqy kómek kórsetetin medısınalyq uıymǵa tirkeý tártibin aıtýǵa bolady», - dedi T. Muratov.