Bul bıylǵy jyly «ArselorMıttal Temirtaý» kásiporyndaryndaǵy alǵashqy jazataıym oqıǵa emes
«ArselorMıttal Temirtaý» AQ metalýrgıa kombınatynda zardap shekken jumyskerdiń jaǵdaıy jaqsardy, dep habarlaıdy Almaty-akshamy.kz QazAqparatqa silteme jasap.
«Shuǵyl is-sharalar nátıjesinde naýqas shok kúıden shyǵaryldy. Qazir onyń jaǵdaıy ortasha aýyr dep baǵalanýda jáne oń dınamıka baıqalady», - dedi Temirtaý qalasynyń ortalyq aýrýhanasy dırektorynyń m.a. Ýlána Bazarova.
Sondaı-aq qaza tapqan 4 qyzmetker jaıly málimetter belgili boldy. Kóz jumǵandar 34-58 – jastaǵy er adamdar.
Jánibek Ábdirasylov otbasyndaǵy jalǵyz asyraýshy bolǵan. Týystarynyń aıtýynsha, Jánibek jazataıym oqıǵaǵa deıin kásiporynda bir aı ǵana jumys istegen. Ol nebári 40 jasta edi.
«Kishkentaı balalar ákesiz qaldy. Bizge kompanıa men ákimdik ókilderi keldi, biz olarǵa óz talaptarymyzdy aıttyq. Jánibektiń ıpotekasy bar. Sondaı-aq bolashaqta balalarǵa turǵyn úı berý týraly másele kóterildi», - deıdi marqumnyń týysy Beısen Esbolov.
«ArselorMıttal Temirtaý» kompanıasy qaza tapqandardyń otbasylaryna ujymdyq shartqa sáıkes kómek kórsetiledi dep ýáde berýde.
Aıta ketý kerek, bul bıylǵy jyly «ArselorMıttal Temirtaý» kásiporyndaryndaǵy alǵashqy jazataıym oqıǵa emes.
Oblystyq eńbek ınspeksıasy basqarmasynyń málimetinshe, osy jyly 6 adam zardap shekken, olardyń ekeýi qaza tapty. Ótken jyly ónerkásiptik alyptyń óndiristerinde 42 adam jaraqat alyp, 9 adam kóz jumǵan.
Osy ýaqytta arnaıy komısıa músheleri tıisti jumys júrgizýde. Komısıa quramyna eńbek ınspeksıasy jáne memlekettik sáýlet-qurylys baqylaýy basqarmasynyń, Temirtaý ákimdiginiń, ónerkásiptik qaýipsizdik departamentiniń barlyq ýákiletti vedomstvolarynyń basshylary, sondaı-aq «ArselorMıttal Temirtaý» kompanıasynyń basshylyǵy jáne «Jaqtaý» metalýrgter kásipodaǵynyń tóraǵasy kirdi.
«Bul másele boıynsha táýelsiz saraptamalyq komısıa tekserý jumystaryna tartyldy. Búgin osy ǵımaratty, peshtiń ózin tekserý boıynsha jumysqa kiristi. Tekserý nátıjeleri boıynsha 3 táýelsiz uıym óziniń saraptamalyq qorytyndysyn beredi», - dep túsindirdi Qaraǵandy oblysynyń eńbek ınspeksıasy basqarmasynyń basshysy Irına Lúbarskaıa.
Arnaıy komısıa kásiporynda 10 kún jumys isteıdi. Sonymen qatar «Eki jáne odan da kóp adamnyń ólimine ákep soqqan qurylys jumystaryn júrgizý kezinde qaýipsizdik erejelerin buzý» baby boıynsha qylmystyq is tergelýde.
Esterińizge sala keteıik, «Qurylysmet»« JSHS aýmaǵynda «ArselorMıttal Temirtaý» AQ qyzmetkerleri qaıǵyly jaǵdaıǵa ushyraǵan bolatyn. Otqa tózimdi qurylysty bólshekteý kezinde sehtyń jumys istemeıtin №9 termıalyq peshiniń tóbesi qulady. Úıindi astynda bes adam qalyp qoıdy.
Onyń tórteýi qaıtys boldy, 1994 jyly týǵan taǵy bir jumysker aýrýhanaǵa jetkizildi.