2022 jyly árbir grantqa 3 mln teńgeden 30 grant beriletin bolady
Aqparat jáne qoǵamdyq damý mınıstrligi Memleket basshysy taǵaıyndaǵan «Táýelsizdik urpaqtary» grantyn usyný jónindegi konkýrstyń bastalǵany týraly habarlaıdy.
Grant berýdiń maqsaty belsendi shyǵarmashyl jastar qaýymdastyǵyn qalyptastyrýǵa baǵyttalǵan jastardyń jańa jáne qoldanystaǵy bastamalaryn memlekettik qoldaý bolyp tabylady.
Konkýrstyq ótinimderdi qabyldaý aıaqtalǵan kezde jasy 14-ten kem emes jáne 29-dan aspaıtyn, konkýrsqa qatysýǵa ótinim bergen Qazaqstan Respýblıkasynyń kez kelgen azamaty úmitker bola alady.
Granttar Qazaqstan Respýblıkasynyń azamatyna jańa ıdeıalar men bastamalardy iske asyrý úshin konkýrstyq negizde mynadaı baǵyttar boıynsha beriledi:
«Ǵylym» – ǵylymnyń basym sektorlarynda jańa ǵylymı jobalardy jáne zertteýlerdi iske asyrýǵa arnalǵan;
«Mádenıet» – Qazaqstannyń mádenı murasyn tanymal etýge, halyqtyq mádenı dástúrler men ónerdi ilgeriletýge baǵyttalǵan jobalardy iske asyrýǵa arnalǵan;
«Aqparattyq tehnologıalar» – jańa IT sheshimder men jobalardy, onyń ishinde jańadan bastalǵan startap jobalardy iske asyrýǵa jáne daıyndaýǵa arnalǵan;
«Bıznes» – ekonomıkanyń basym sektorlarynda jańa bıznes-ıdeıalardy iske asyrýǵa arnalǵan;
«Medıa» – jańa medıa jobalardy, onyń ishinde jastar úshin tanymdyq, paıdaly, qyzyqty kontent qurý jónindegi jobalardy iske asyrýǵa arnalǵan.
Úmitkerlerdiń konkýrstyq ótinimderi (qaǵaz nusqada) aǵymdaǵy jylǵy 14 tamyzǵa deıin myna mekenjaı boıynsha qabyldanady: Nur-Sultan qalasy, Máńgilik El dańǵyly, 8, «Mınıstrlikter Úıi» Ákimshilik ǵımaraty (14-kireberis); Baılanys nómirleri: 8(7172)74-12-78, 8(702-000-88-12), (elektrondyq nusqasy) generation.kaz@gmail.com poshtasyna qabyldanady.
Konkýrstyq ótinimder memlekettik jáne (nemese) orys tilderinde qabyldanady jáne:
1) nysan boıynsha jobanyń sıpattamasy;
2) jobanyń beıne-tanystyrylymy (60 sekýndtan aspaıdy);
3) shyǵystar smetasynyń jobasy;
4) zıatkerlik menshik týraly málimetter (bar bolsa) qamtylýy tıis.
Aıta keteıik, 2021 jyly Táýelsizdik kúni qarsańynda Memleket Basshysy Q.K. Toqaev elimizdiń 30 jas azamatyna «Táýelsizdik urpaqtary» grantyn tabys etti. Onyń ishinde 5 jas adam «Mádenıet» baǵyty boıynsha, 6 adam - «Ǵylym», 5 adam - «Aqparattyq tehnologıalar», 5 adam - «Medıa», 9 adam - «Bıznes». QR Memlekettik hatshysynyń 2022 jylǵy 25 aqpandaǵy №2 Ókimimen grant alýshylar Namýradın Aısana men Naýmova Dınara QR Prezıdentiniń janyndaǵy jastar saıasaty jónindegi Keńestiń quramyna kirdi.