Medeý shatqalynda kórnekti qazaqstandyq álpınıs Anatolıı Býkreev músininiń saltanatty ashylýy ótti.
Saltanatty rásimge Almaty ákiminiń orynbasary Arman Qyryqbaev, músinshi Nurlan Dalbaı, álpınızmnen Qazaqstan quramasynyń bas jattyqtyrýshysy, tálimger jáne Býkreevtiń dosy Ervand Ilınskıı, jýrnalıs jáne aty ańyzǵa aınalǵan álpınısiń kúndelikterine negizdelgen Býkreev týraly «Nad oblakamı» kitabynyń avtory Galına Mýlenkova jáne taǵy basqalar qatysty, dep habarlaıdy Almaty-akshamy.kz.
Músinniń avtory – Nurlan Dalbaı. Ol Anatolıı Býkreevti quzǵa shyǵar aldynda sál demalyp turǵan keıpinde beınelegen. Álpınısiń qoly muz shapqyshqa tıip tur. Músin Nurlan Smaǵulov qorynyń bastamasymen jáne qoldaýymen ornatyldy.
Bul - Nurlan Smaǵulov qorynyń qala turǵyndaryna bergen úshinshi músini. Mesenattyń jospary boıynsha, qalamyzda kórnekti almatylyqtar músinderiniń serıasy paıda bolýy tıis.
Alǵashqysy - Sháken Aımanovtyń músini. Ol 2019 jyly «Almaty» qonaq úıiniń janyna ornatylǵan bolatyn. Bul – sol kezdegi shyǵarmashylyq zıaly qaýym jınalyp, «Taqıaly perishte» kınosy túsirilgen jer.
Ekinshisi - Gerold Belgerdiń músini 2021 jyly ashyldy. Ol Gerold Karlovıch sońǵy jyldary turǵan úıdiń janynda ornalasqan. Qola oryndyq metr demalyp otyrýdy unatatyn oryndyqty almastyrdy. Qazirgi ýaqytta «súıikti dárigerimiz» Iýrıı Pomeransevtiń músini daıyndalýda. Músin bıyl Iý.M. Lermontov atyndaǵy teatrdyń janyna ornatylady.
2023 jyldyń 16 qańtarynda Býkreev 65 jasqa tolar edi. Anatolıı Nıkolaevıch – bıik taýdaǵy álpınıs, eńbek sińirgen sport sheberi,«Qar barysy» ataǵynyń ıegeri, segiz myńdyq planetanyń 14 taýynyń 11-in jáne tórt ret Everesti baǵyndyrǵan. Onyń Everestke kóterilýiniń biri Baltazar Kormakýrdyń «Everest» gollıvýdtyq fılminiń negizi boldy. Anatolıı Býkreev – «Erligi úshin» ordeniniń ıegeri (1989), óz ómirine qaýip tóne tursa da, taýda adamdardy qutqarǵan álpınıserge beriletin amerıkandyq álpınızm klýbynyń eń joǵary nagradasy — Devıd Soýls medaliniń ıegeri (1997), qaıtys bolǵannan keıin «Erligi úshin» qazaqstandyq medalimen marapattaldy (1998).
