Bul – eshqandaı talqylaýdy qajet etpeıtin ádiletti talap.
Májilis depýtaty Amanjol Áltaı 31 mamyr – Saıası qýǵyn-súrgin qurbandaryn eske alý kúni bolǵandyqtan, mektepterdegi sońǵy qońyraý kúnin basqa kúnge aýystyrýdy talap etti, dep habarlaıdy Almaty-akshamy.kz
Májilismenniń saýalyna Oqý-aǵartý mınıstriniń 2022 jylǵy 12 tamyzdaǵy 363 buıryǵyna sáıkes, orta bilim beretin mektepterdegi sońǵy qońyraý kúniniń 31 mamyr bolyp bekitilýi sebep bolǵan.
Amanjol Áltaı Qazaqstanda 31 mamyr - Asharshylyq jáne saıası qýǵyn-súrgin qurbandaryn eske alý kúni bolyp belgilengenin eske saldy.
«Alash arystarynyń muratyn jalǵastyryp, amanatyn urpaq sanasyna sińirýge tıisti mınıstrliktiń 31 mamyr kúniniń mańyzyna mán bermegeni qandaı ókinishti! Arystarymyzdyń rýhyna bir kúndi de qımaı, apyl-ǵupyl aza tutqansyp, ile-shala toı toılap, dýmandatyp kete beretin bolsaq, eldigimiz qaısy?! Sondyqtan mektepterdegi sońǵy qońyraý kúnin 30 mamyrǵa, ne bolmasa 1 maýsymǵa aýystyrý kerek. Bul – eshqandaı talqylaýdy qajet etpeıtin ádiletti talap», - dedi Áltaı Premer-Mınıstrdiń orynbasary Altaı Kólginovke joldaǵan depýtattyq saýalynda.
Sondaı-aq depýtat 31 mamyr kúni adamdardy áleýmettik jelilerdegi eldiń birligine, mádenıetine nuqsan keltiretin teris ádetterden tyıylýǵa shaqyrdy.
«31 mamyr – azattyq úshin arpalysyp ótken, memleket qurý jolynda mert bolǵan, ult úshin atylǵan, urpaq baqyty úshin azap shekken asyl babalar aldyndaǵy paryzymyzdy paıymdaıtyn, alash amanatyna adal bolýǵa qulshynatyn kún. Úkimet osy kúnniń mán-mańyzyna laıyqty sharalardy iske asyrýy tıis», - dedi depýtat.
Osyǵan baılanysty Amanjol Áltaı Úkimetke mynadaı sharalar qabyldaýdy surady:
- «Jalpy halyqtyq únsiz eske alý mınýty» sharasyn dástúrli túrde ótkizýi kerek. Sol sátte el aýmaǵyndaǵy búkil kólik qozǵalysy toqtatylyp, bir mınýttyq únsizdik arqyly saıası qýǵyn-súrgin jáne asharshylyq qurbandaryn eske alý qajet;
- mektepterdegi sońǵy qońyraý kúni 31 mamyrdan basqa kúnge aýystyrylsyn;
- telearnalarda ázil-qaljyń, shoý baǵdarlamalar, estradalyq konsertter toqtatylyp, onyń ornyna el tarıhyndaǵy qasiretti kúnderdi jas urpaqtyń túsinýine jol ashatyn mazmundy baǵdarlamalar kórsetilýi tıis;
- aqparattyq quraldarda ataýly kúnniń tarıhı salmaǵyn, taǵylymdyq maǵynasyn jan-jaqty jetkizetin maqalalar jarıalansyn. Sol kúni meıramhanalarda toı ótkizýge tyıym salynsyn;
- 31 mamyr kúni ár ata-ana otbasyndaǵy tálimdi áńgimesin, ustaz sabaǵyn, din ókilderi ýaǵyzyn, mınıstrlikter men ákimdikter, memlekttik mekemeler jumys kúniniń basyn asharshylyq pen qýǵyn-súrgin qurbandaryn eske alýmen bastaǵany durys;
- balabaqshalar men mektepterde, joǵarǵy oqý oryndarynda balalar men jastarǵa arnaýly dárister, pikirlesý saǵattaryn, zıaly qaýym ókilderimen kezdesý keshteri ótkizilsin.