Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklárdyń jaýabynda aıtylǵan, dep habarlaıdy Almaty-akshamy.kz.
«Ótken jyly ishki ister organdary jyldamdyq rejımin buzýdyń 3,1 mln astam deregin anyqtady. Jaıaý júrginshiler jol bergen 280 myńǵa jýyq quqyq buzýshylyqtyń jolyn kesti. Jol júrisi qaýipsizdigin qamtamasyz etýde buzýshylyqty tirkeýdiń avtomatty júıeleri (budan ári – BTAJ) óziniń tıimdiligin dáleldedi. Joldarda barlyǵy 18 myńnan astam BTAJ ornatyldy. Onyń kómegimen ótken jyly 5 mln buzýshylyq anyqtalyp, memleket búdjetine aıyppul túrinde 33 mlrd teńge tústi», - dep atap ótti birinshi vıse-premer jaýabynda.
Onyń dereginshe, halyqaralyq oń tájirıbeni eskere otyryp, birqatar óńirde patrúldik avtomobılderdi zamanaýı zıatkerlik keshendermen jaraqtandyrý tájirıbesi engizildi. BTAJ jelisin damytý aıasynda «Qorǵaý – qaýipti júrgizýshi» mobıldi qosymshasy ázirlendi. Onda «Sergek» júıesiniń kameralary men İshki ister mınıstrliginiń Jedel basqarý ortalyqtarynyń múmkindikteri ıntegrasıalanǵan.
«Bul naqty ýaqyt rejıminde tehnıkalyq tekserýden ótpegen, saqtandyrý polısinsiz paıdalanylatyn, baǵdarlary boıynsha izdestiriletin jáne jalǵan memlekettik tirkeý nómirlik belgilerin paıdalanatyn avtomobılderdi anyqtaýǵa múmkindik beredi. Búgingi tańda mundaı mobıldik qosymshalar elimizdiń barlyq óńirinde odan ári taratyla otyryp, 11 qalada (Astana, Almaty, Shymkent, Atyraý, Túrkistan, Óskemen, Petropavl, Qaraǵandy, Temirtaý, Kókshetaý jáne Oral) engizildi», - dedi Roman Sklár.