Jabyq nysannyń jalpy aýmaǵy 450 sharshy metr
Medeý muz aıdyny kesheni endi qysqy mezgilde ǵana emes, jaz maýsymynda da jumys isteıdi. Nysannyń ashylǵanyna 50 jyl tolýyna oraı mundaı múmkindik demalýshylarǵa alǵash ret berilip otyr, dep habarlaıdy Almaty-akshamy.kz Almaty.tv-ge silteme jasap.
Jabyq nysannyń jalpy aýmaǵy 450 sharshy metr. Aýmaǵy úlken bolmasa da kelýshiler endi jaz mezgilinde de kónkı tebýge múmkindik alady. 1 maýsym kúni jumysyn bastaǵan ortalyq tamyz aıynyń sońyna deıin ashyq bolady. Uıymdastyrýshylar shilińgir shilde men tamyljyǵan tamyz aıynda da demalýǵa keletinderdiń kóp bolatynyna senimdi.
«Biz jazǵy demalysqa shyqtyq. Qysta biz kelip úlgermep edik, sabaq boldy. Endi qazir jaz kezinde de ashylǵanyna qýanyshtymyz», – dedi demalýshy Danıal Ótegen.
«Biz Batys Qazaqstan oblysy Oral qalasynan Almatyǵa otbasymyzben demalýǵa keldik. Medeýde jazǵy kezde kónkı tepkenimizge qýanyshtymyz. Kóńildi demalys bolyp jatyr», – dedi demalýshy Mahabbat Qydyrova.
Uıymdastyrýshylar jaz mezgilinde muzdy qatyrý asa kúrdeli ekenin aıtady. Ol úshin túrli tehnologıalarmen jabdyqtalǵan muzdatqyshtar ornatylǵan.
«50 jyldyq tarıhta birinshi ret jasap otyrmyz. Bul – úlken nátıje. Aldaǵy ýaqytta jazǵy katoktyń aýdanyn úlkeıtemiz degen oıymyz bar. Óıtkeni qazir tehnologıalar damyp jatyr», – dedi «Medeý» muz aıdynynyń dırektory Abylaı Qondybaev.
Demalys ortalyǵy úzilissiz tańǵy saǵat 10:00-den keshki 10.00-ge deıin jumys isteıdi. Bılet baǵasy eresekterge 1500, al 14 jasqa deıingi balalar úshin 1000 teńge. Kónkılerdi jalǵa alý quny ólshemine qaraı myń teńge men 2 myńnyń aralyǵynda.