Aýyl ákimi bolsa qylmystyń kóbeıip ketkenin aıtyp, maman tapshylyǵyn alǵa tartty
Almaty oblysynda urylar bir kúnde 4 úıdi tonap ketti. Oqıǵa Talǵar aýdanyna qarasty Kóktal aýylynda bolǵan. Osyǵan baılanysty turǵyndar narazylyqqa shyǵyp, polısıanyń áreketsizdigine shaǵymdandy, dep habarlaıdy Almaty-akshamy.kz Almaty.tv-ge silteme jasap.
Turǵyndardyń aıtýynsha, aýylda tártip saqshylary bolmaǵandyqtan baýkespeler ońaı oljany kásipke aınaldyrǵan. Aýyl turǵyndary urylardyń áreketinen ábden mezi bolǵan. Ońaı oljaǵa kenelip úırengender úıde eshkim joq ymyrt ýaqytta kıim-keshekten bastap, tehnıkaǵa deıin úptep ketedi eken. Jıylǵan jurtshylyqtyń aıtýynsha, baýkespeler bul isti 2018 jyldan bastap kásipke aınaldyrǵan. Biraq qylmys áli ashylmapty.
«Uryny ustaý kerek qoı. Ol kisi úırendi. Jergilikti polısıa áreket etpeıdi, ákim jumys istemeıdi esh nátıje joq. Biz qarapaıym halyqtyń aıqaıyn eshkim estimeıdi. Ol urlaı beredi», – dedi Kóktal aýylynyń turǵyny Bota Nuqatova.
«2018 jyly bizdiń úıde urlyq boldy. Alatyn zattary sol teledıdar, kompúter, prınter, shańsorǵysh boldy. Bári de jańa. Qymbat tehnıka bolatyn», – dedi Kóktal aýylynyń turǵyny Nurgúl Bekseıitova.
Shyńǵys Ibraevtyń shańyraǵy da urylardyń qarmaǵyna túsken. Ol 1 maýsymda balalaryn qydyrtý úshin otbasymen Almatyǵa ketip qalǵan. Úıine kelse 650 myń teńgesi men altyn buıymdary jáne basqa da baǵaly zattary qoldy bolǵan.
Úı ıesiniń aıtýynsha, ury aldyn ala jospar boıynsha áreket etken. Áýeli qurylǵymen terezeni buzyp, úıge kirgen. Al aǵashty bireý kelgen jaǵdaıda qarsylyq tanytý úshin birge alyp júripti. Keıin qomaqty aqshaǵa kenelgen adam quraldardyń bárin tastap ketken.
«Keshe keshki saǵat 10:00-de úıge kelgende úıimizge urlyq túskenin baıqadyq. Sol sátte bárimiz dalaǵa shyǵyp, polısıaǵa shaǵymdandyq. Men polısıanyń jumysyna qanaǵattanbaımyn. Nege polısıa sondaı uzaq ýaqytta keledi. Eger adam óltirip jatqan jaǵdaı bolsa, ne bolýshy edi», – dedi Kóktal aýylynyń turǵyny Shyńǵys Ibraev.
Aýyl ákimi bolsa qylmystyń kóbeıip ketkenin aıtyp, maman tapshylyǵyn alǵa tartty.
«Bizde 12 eldimeken bar. Shtat boıynsha 4 polısıa. Qazir 2 adam qyzmet etip jatyr 12 aýylǵa. Olarda 1 mashına», – dedi Qaınar aýyldyq okrýginiń ákimi Nurbolat Manapbaev.
Al polısıa departamenti turǵyndardyń sózimen kelispeıdi. Máselen, jyl basynan beri tirkelgen birneshe tonaý faktisiniń bireýi ǵana ashylǵan eken.
«Talǵar aýdany Kóktal aýylynda 2063 adam turady. Resmı málimetterge sáıkes, eldimekende bótenniń múlkin tonaý boıynsha 6 urlyq tirkelgen. Osy qylmystyq ister boıynsha kúdiktilerdi anyqtaý maqsatynda birqatar jedel izdestirý jumystary júrgizilip jatr. Qylmystyń kýágeri pysyqtalyp, kúdiktilerdiń ketý joldary boıynsha ornatylǵan beınebaqylaý kameralary tekserilip jatyr», – dedi Oblystyq PD resmı ókili Ernar Saıdildın.
Al shydamy taýsylǵan aýyl turǵyndary tártip saqshylary bul joly da qylmysty asha almasa, óz arasynan kúndelikti halyq jasaǵyn shyǵaryp, urylardyń jazasyn ózimiz beremiz dep otyr.