Medeý aýdany sapaly ınjenerlik ınfraqurylymmen qamtamasyz etý maqsatynda úlken jumys istep jatyr. Basty sharýanyń biri – aýdan turǵyndaryn, sonyń ishinde alys jáne taýly shaǵyn aýdandardy ortalyqtandyrylǵan sýmen jabdyqtap, sý burý júıesine qosý bolyp otyr. Óńirlik komýnıkasıalar qyzmetiniń alańynda Medeý aýdanynyń ákimi Erkebulan Orazalın osylaı dedi.
Ótken jyldyń qazan aıynan bastap «Balqash» rezervýarynan «Muztaý» shaǵyn aýdanyna deıin 2,2 shaqyrym magıstraldyq jeli tartyla bastaǵan. Jobany iske asyrýǵa 574 mıllıon teńge bólindi. Jobanyń sońyna taman 2 000 adam taza aýyz sýmen qamtamasyz etiledi. Jumys 2025 jyldyń qyrkúıeginde aıaqtalyp qalady.
«Kamenskoe plato» shaǵyn aýdanyna erekshe nazar aýdarylyp otyr. Ótken jyly munda 6 artezıan uńǵymasy, 12 sorǵy, 7 rezervýar salynyp, 6,1 shaqyrymdyq magıstraldyq jeli tartyldy. Bıyl jalpy uzyndyǵy 50 shaqyrym bolatyn taratý jelisiniń qurylysy bastaldy. Bul shaǵyn aýdan turǵyndaryn taza aýyz sýmen turaqty qamtamasyz etýge múmkindik bermek. Qurylys 2026 jyldyń qyrkúıeginde aıaqtalady.
Qosymsha «Atyraý», «Alataý», «Gornyı gıgant» pen «Malaıa Stanısa» shaǵyn aýdandarynda da aýqymdy jobalar iske asyrylady. Bul aýmaqtarda 21 shaqyrym sý qubyry men 45,2 shaqyrym káriz jelisi salynyp jatyr. Sonyń arqasynda Medeý aýdanyndaǵy 21 myńnan astam turǵynnyń alǵash ret ortalyqtanǵan sýǵa qoly jetip, sý burý júıesine qosylǵaly otyr.