Almaty ákimi Erbolat Dosaev Medeý aýdanynyń turǵyndarymen kezekti kezdesý ótkizdi. Qala ákimdiginiń baspasóz qyzmetinde 2023 jyldyń qyrkúıeginde aýdan turǵyndarymen kezdesýde megapolıs basshysynyń bergen tapsyrmalarynyń oryndalǵany týraly aıtyldy.
Sol kezde turǵyndar sýmen úzdiksiz qamtamasyz etý, joldardy jóndeý, aýlalardy abattandyrý, avtobýstardy jańartý jáne t.b. máselelerdi kótergen bolatyn, dep habarlaıdy Almaty-akshamy.kz.
Nátıjesinde, Kamenskoe plato, Kólsaı, Muztaý jáne Iýbıleınyı shaǵyn aýdandarynda 7,3 myń m3 sý sıatyn 7 rezervýar salyndy. Sondaı-aq, ónimdiligi táýligine 15,7 myń m3 sý bolatyn 6 skvajına rekonstrýksıalandy. Búginde nysandardy naýryz aıynda tolyq iske qosýǵa qatysty jumystar júrgizilýde.
Aýdan jurtshylyǵynyń ótinishi boıynsha 18 baǵyttaǵy jyljymaly quramdy jańartý aıaqtaldy, 4 jańa marshrýt iske qosyldy (№43, 75, 232, 233) 5 jańa aıaldama kesheni salyndy (Qaıdarov, Qaıypov, Ibragımov, Bazarbaev kósheleri, №47 mektep).
Sonymen qatar, aýdannyń 28 kóshesinde uzyndyǵy 21,8 km ortasha jóndeý jumystary aıaqtaldy, aǵymdaǵy jóndeý aıasynda 2023 jyly 56 myń m2 jol tósemi qalpyna keltirilip, uzyndyǵy 24,5 km 29 kóshede trotýar jasaldy.
Aýdan turǵyndary "Jýrnalıser" skveriniń uzaq jóndelgeni týraly shaǵymdanǵan bolatyn. Nátıjesinde jumystar ótken jyldyń sońynda aıaqtaldy. Rekonstrýksıalaý aıasynda jabyndylar tóseldi, jańa oryndyqtar, ýrnalar qoıyldy, 3,8 myń buta men 10 týıa otyrǵyzyldy. Sonymen qatar, Ospanov kóshesindegi jaıaý júrginshiler aımaǵynyń qurylysy aıaqtaldy, onda trotýar keńeıtilip, 80 sýretshiniń jumysymen bezendirilgen graffıtı qabyrǵasy jasaldy.
Budan basqa, "Alataý" shaǵyn aýdanynda 600 adamǵa deıin qabyldaı alatyn deneshynyqtyrý-saýyqtyrý kesheniniń qurylysy aıaqtaldy. Búginde sport nysany tehnıkalyq rejımde jumys isteıdi.
Jyl qorytyndysy boıynsha aýdanda 80 aýla aýmaǵy aǵymdaǵy jóndeýden ótti, úılerdiń 23 qasbeti jańartyldy, 13 jer ústi jáne jerasty jaıaý júrginshiler ótkeli jóndeldi, 4 avtosýarý júıesi qaıta jańartyldy jáne 2 qoǵamdyq keńistik abattandyryldy. "Halyq qatysatyn búdjet" baǵdarlamasy aıasynda jalpy somasy 1,6 mlrd.teńge bolatyn 44 joba iske asyryldy.