Almaty ákimi Erbolat Dosaevtyń Medeý aýdanynyń turǵyndarymen kezdesýinde Ladýshkın kóshesi 65 úıdiń turǵyny turǵyndardyń tynyshtyǵyn buzatyn avtoshabandozdarǵa qatysty sharalar qabyldaýdy surady, dep habarlaıdy Almaty-akshamy.kz.
«Kóktemnen bastap, túngi ýaqytta Dostyq kóshesinde jastar arasynda naǵyz jarys bastalady. Kólikterdiń dybysy, motordyń gúrili jáne qatty mýzyka uıyqtaýǵa kedergi keltiredi. Tynyshtyqty buzýshylarmen kúresýińizdi suraımyz», - dedi turǵyn.
Almaty qalasynyń ákimi Erbolat Dosaevtyń jaýaby:
«Biz aýdan turǵyndarynyń shaǵymyn eskerdik. Túngi tynyshtyqty buzǵandarǵa jaýapkershilik bar. Polısıa departamenti ókilderimen birlesip, Dostyq dańǵyly, Kereı-Jánibek handar kóshesinde «Sergek» beınekameralaryn ornatýdy tapsyrdym. Onda jyldamdyq shekteýli. Beınebaqylaý kameralary bul jaǵdaıǵa oń áser etetinine senimdimin», - dedi Erbolat Dosaev.
Medeý aýdanynda qoǵamdyq qaýipsizdikti qamtamasyz etý maqsatynda 2023 jyly barlyǵy 57 «Sergek» aparattyq-baǵdarlamalyq kesheni ornatyldy. Bıyl «Sergek» 30 aparattyq-baǵdarlamalyq kesheni men 750 beınemonıtorıng júıesiniń kamerasyn ornatý josparlanǵan.