Ál-Farabı atyndaǵy QazUÝ-dyń teorıalyq ıadrolyq fızıka kafedrasynyń meńgerýshisi Medeý Ábishevtiń pikirinshe, Qazaqstanda atom elektr stansıasyn (AES) salý eldiń barlyq salalaryna mýltıplıkatıvti áser etetin mańyzdy qadam bolady, dep habarlaıdy aqshamnews.kz
– Meniń oıymsha, Qazaqstanda AES qurylysy ekonomıka, ǵylym jáne bilim berý salalaryna úlken serpin beredi. Atom elektr stansıasynyń qurylysynan keletin oń áserler qoǵamnyń belgili bir bóliginde aıtylyp júrgen kúmándardan basym túsedi. AES qurylysy kezinde de, onyń keıingi eksplýatasıasy barysynda da áleýmettik salalarǵa jaǵymdy áserin tıgizedi. Sonymen qatar, qazirgi zamanǵy osyndaı jobalarda qaýipsizdik deńgeıi joǵary ekeni eskeriledi, – dep atap ótti Medeý Ábishev.
Mamannyń aıtýynsha, mamandardy daıarlaý máselesi erekshe oryn alady.
– AES úshin shamamen 2000 jańa maman qajet bolady. Onyń ishinde ıadrolyq energetıka salasynda keminde 200 adam qajet bolady, olardyń basym bóligi otandyq joǵary oqý oryndarynda daıarlanady. Stansıa qurylysyna ýaqyt jetkilikti, sondyqtan tıisti talaptardy eskere otyryp, oqytýdy bastaýǵa bolady. Osylaısha, elimizde AES-ti basqarýǵa qajetti jańa tehnologıalyq prosester ıgeriledi.
Sonymen qatar, túrli salalarda ǵylymı zertteýler qajet bolady. Jobalaý ınstıtýttary qandaı kásiporyndar men ekonomıkalyq modelderdi ázirleý kerektigin esepteıtin bolady. Jalpy, AES Qazaqstanda ekonomıka, ǵylym, bilim jáne bıznes salalaryna qýatty serpin beredi, – dep qorytyndylady Medeý Ábishev.