Kárim Másimovke qatysty is boıynsha derekter jarıalanbaıdy. Bul týraly QR Ulttyq qaýipsizdik komıteti tóraǵasynyń orynbasary Marat Qalqabaev aıtty, dep habarlaıdy Almaty-akshamy.kz QazAqparatqa silteme jasap.
«Tergeý amaldary barysynda bári anyqtaldy. Árıne, men kóp nárseni aıta almaımyn. Biraq ol (Másimov) tıisti sheshim qabyldamady. Birinshi basshy ózi qabyldaýy tıis sheshimderdi jasamaǵan. Osymen boldy. Sondyqtan ol qylmystyq jaýapkershilikke tartylady», - dedi M.Qalqabaev Májiliste tilshiler suraǵyna jaýap bere otyryp.
Sonymen qatar ol is materıaldarynyń derekteri jarıalanbaıtynyn aıtty.
«İs derekteri óte qupıa. Ol boıynsha tolyq aqparat berilmeıdi. Memlekettik qupıany jarıa etpeý týraly zań bar. Qylmystyq is «óte qupıa» sanatyna jatqyzylǵan», - dedi M.Qalqabaev.
Budan buryn habarlanǵandaı, bıyl sáýir aıynda Astana qalasynyń qylmystyq ister jónindegi mamandandyrylǵan aýdanaralyq soty Ulttyq qaýipsizdik komıtetiniń burynǵy tóraǵasy Kárim Másimovke jáne onyń orynbasarlary A.Sadyqulovqa, D.Erǵojınge, M.Osıpovke qatysty qylmystyq is boıynsha úkimin jarıa etti.
Sot sheshimimen atalǵan úsh bap boıynsha da kináli dep tanylǵan K.Másimov 18, A.Sadyqulov 16 jylǵa, D.Erǵojın taǵylǵan aıyptarǵa sáıkes 15 jylǵa, M.Osıpov bolsa bılik pen laýazymdyq ókilettigin asyra paıdalaný babymen 3 jylǵa bas bostandyǵynan aıyryldy. Sottalýshylardyń barlyǵy ómir boıy memlekettik qyzmette laýazym ıelene almaıdy. Sonymen qatar barlyǵy general shenderinen jáne memlekettik nagradalarynan aıyrylady.