Ótken túni Marokkoda bolǵan joıqyn zilzala saldarynan qaza tapqandar sany jergilikti saǵat 19.00-degi (GMT+1) jaǵdaı boıynsha, 1305 adamǵa jetti.
Taǵy 1832 adam zardap shekti, olardyń 1220-sy asa aýyr halde. Bul týraly Almaty-akshamy.kz EFE-ge silteme jasap habarlaıdy.
Eldiń İshki ister mınıstrligi jarıalaǵan sońǵy málimetke sáıkes, mert bolǵandar sany ondaǵan provınsıada tirkeldi: jer silkinisi oshaǵyna jaqyn ornalasqan Marrakeshtiń ońtústigindegi El-Haýzda 694 adam kóz jumdy, odan keıin tizimde Tarýdant (347 adam mert boldy), Chıchaýa (191), Ýarzazat (39), Marrakesh (14), Azılal (11), Agadır (5), Kasablanka (3), Al-Úsýfıa (1) jáne Tıngýır (1) tur.
Marokko koroli Muhammed VI kóptegen adamnyń qazasyna baılanysty elde úshkúndik qaraly kún jarıalady. Sondaı-aq ol zardap shekkenderge kómek kórsetý jáne zaqymdalǵan ǵımarattardy qalpyna keltirý boıynsha tótenshe jaǵdaı baǵdarlamasyn ázirleýdi buıyrdy.
Eske salsaq, Prezıdent Qasym-Jomart Toqaev Marokko Koroli VI Muhammedke kóńil aıtý jedelhatyn joldaǵan bolatyn.
