12 mamyrda búkil álemdegi meıirgerler ózderiniń kásibı merekesin – Halyqaralyq meıirgerler kúnin atap ótedi. Medısınalyq uıymdardyń qyzmetin dárigerlerdiń ǵana emes, pasıentterdiń de bas kómekshisi bolyp tabylatyn meıirgersiz elestetý múmkin emes.
«Kardıologıa jáne ishki aýrýlar ǵylymı-zertteý ınstıtýtynyń barlyq meıirgerleri jyly lebizder men shynaıy alǵys sózderge laıyq. Meıirgerlerdiń jumysy dári-dármekterdi berý nemese ómirlik mańyzdy kórsetkishterdi tekserý ǵana emes, olar pasıenttiń qalpyna kelý prosesiniń ár kezeńinde de janynan tabylady. Meıirgerlik kútim – sapaly jáne qaýipsiz medısınalyq qyzmet kórsetýdiń negizi. Meıirgerlerdiń densaýlyq saqtaý júıesindegi róli klınıkalyq daǵdylardy, kóshbasshylyqty, beıimdelýdi jáne emosıonaldy turaqtylyqty qajet ete otyryp, odan ári artyp otyr», – deıdi Kardıologıa jáne ishki aýrýlar ǴZI Basqarma tóraǵasy Marat Pashımov.
Atalmysh ınstıtýttaǵy meıirgerler – ár pasıentke ýaqytyly jáne jan-jaqty kómek kórsetetin klınıkalyq toptyń ajyramas músheleri. Olardyń óz isine adaldyǵy kúndelikti ómirde ǵana emes, sonymen qatar pasıentterdiń qajettiligin qalaı boljaıtyndyǵynda jáne medısınalyq kómektiń eń joǵary standarttaryn saqtaýynda kórinedi.
Mysaly, 2024 jyly JCI akredıtteýden qaıta ótý kezinde halyqaralyq saraptama komısıasynyń aýdıtorlary klınıkanyń dárigerleriniń jáne de meıirgerleriniń kásibı biliktiliginiń joǵary áleýetin rastady. JCI standarttary boıynsha uıymdaǵy barlyq bólimshe men prosester baǵalandy: dáriger men meıirgerlik kútimnen bastap ǵımarattyń qaýipsizdigine, ınfeksıalyq baqylaýǵa, dári-dármekpen jumys isteýge, pasıenttiń quqyqtaryn saqtaýǵa deıin. Aýdıtorlar meıirgerler men dárigerlerdiń tıimdi toptyq jumysyn atap ótti.
Meıirger – bul janashyrlyq pen adaldyqqa negizdelgen densaýlyq saqtaý salasynyń erekshe názik, biraq kúshti jaqtarynyń biri. Ol – adamzatty saýyǵýǵa jeteleıtin aıaýly jan.
"Bizdiń mısıamyzǵa sáıkes, ınstıtýttyń qyzmeti densaýlyq saqtaý júıesiniń ǵylym, bilim men praktıkasynyń úshtuǵyrlyǵy qaǵıdaty sheńberinde júzege asyrylady. Osy turǵyda, meıirger mamandaryna úzdiksiz bilim berý sheńberinde biz medısınadaǵy zamanaýı standarttar men jańa tehnologıalardy eskere otyryp, formaldy/formaldy emes oqytý baǵdarlamalaryn engizýdemiz, sondaı-aq pánaralyq ózara is-qımyl jáne komandalyq jumys daǵdylaryn damytýdamyz. Meıirger isiniń ártúrli salalaryndaǵy sarapshylardyń qatysýymen pasıentterge kútim jasaýdyń jáne zamanaýı medısınalyq qurylǵylardy paıdalanýdyń jańa ádistemeleri boıynsha trenıńter, semınarlar men sheberlik klastaryn ótkizemiz. Meıirgerler kásiptik aýrýlardyń aldyn alý jáne sozylmaly naýqastarǵa kútim jasaý máseleleri boıynsha úzdiksiz biliktiligin arttyrýda. Olardy sımýlásıalyq trenıńter arqyly praktıkalyq daıarlaý qamtamasyz etiledi. Mundaı sharalar meıirgerlerdiń kásibı deńgeıin arttyrýǵa, densaýlyq saqtaýdyń qazirgi zamanǵy talaptaryna sáıkes medısınalyq qyzmet kórsetý sapasyn jaqsartýǵa yqpal etedi", – dedi M.Pashımov.
