Almatydaǵy Ábilhan Qasteev atyndaǵy QR Memlekettik óner mýzeıinde qazaq ónerindegi mal sharýashylyǵynyń sımvolızmin kórsetetin erekshe kórme ótti. «Qunart: qazaq ónerindegi qoı beınesiniń tarıhy» ekspozısıasy dástúr men zamanaýılyqty sheber ushtastyra otyryp, Qazaqstannyń mal sharýashylyǵy men mádenıetine nazar aýdartatyn Qunar+ realıtı-shoýynyń laıyqty jalǵasy ispetti.
Kórme – qazaq halqynyń ómirindegi eń mańyzdy taqyryptardyń biri mal sharýashylyǵyn vızýaldy túrde beıneleıtin biregeı joba. Qoı sharýashylyǵy kóshpeli halyq úshi ǵasyrlar boıy basty kásip boldy, al sheksiz dala men jartylaı shóleıt jaıylymdar qoı ósirýge óte qolaıly jaǵdaı jasady. Bul kásip ata-babamyzdy etpen, júnmen, sútpen, terimen qamtamasyz etip qana qoımaı, osy ónimderdi kórshiles otyryqshy halyqtarmen aıyrbastaýǵa da múmkindik bergen.
Kórkem jobanyń basty ereksheligi – Á.Qasteev atyndaǵy QR Memlekettik óner mýzeıiniń qoryndaǵy biregeı koleksıasymen jumys isteý boldy. Kórmeniń kýratory Olá Veselova mýzeı qorynda saqtalǵan týyndylardy muqıat zerttedi. Nátıjesinde kórmege sırek qoıylatyn ári kórermen nazaryna jıi ilige bermeıtin shyǵarmalar tańdaldy. Olardyń qatarynda Ábilhan Qasteev, Anarbek Naqysbekov, Konstantın Plúhın, Sahı Romanov,
Ábdirashıt Sydyhanov, Ǵanı Baıanov, Baqyt Bápıshev, Aısha Ǵalymbaeva, Moldahmet Kenbaev, Janataı Shardenov jáne basqa da sýretshilerdiń týyndylary bar.
Sonymen qatar, kórmege Aıjan Bekqulova, Shamıl Gýlıev, Baqyt Búbiqanova, Almagúl Meńlibaeva, Saıd Atabekov, Sáýle Dúsenbına, Muratbek Turbaı, Ánýar Músirepov, Láılá Jarqyn syndy qazirgi zamanǵy otandyq sýretshiler de qatysqan.
«Qunar» jobasy arqyly biz fermerlik pen aýyl turmysyna jańasha baǵytta qaraý ótkenniń emes, bolashaqtyń isi ekenin kórsetkimiz keledi. Qunar+ realıtı-jobasyn qazaq tilinde jasaǵanymyz da sondyqtan. Ata-babamyzdyń daýysy óz tilimizde shynaıy estilip, búgingi urpaqqa kúsh bersin deımiz. Qunar realıtı-jobasynyń ıdeıasyn qolǵa alǵanda bizdi bir statısıka qatty oılandyrdy: 1990 jyly Qazaqstanda 9,8 mıllıon iri qara men 36 mıllıon usaq mal bolǵan. Qazir bul kórsetkish – 8,5 pen 21 mıllıon ǵana. Bul jaı sandar emes, bul bizge oı salatyn, áreketke ıtermeleıtin shyndyq. Biz bolashaqty oılasaq, búginnen bastaýymyz kerek, – deıdi «Qunar Creative» qoǵamdyq birlestiginiń negizin qalaýshy jáne joba jetekshisi Aqerke Tatısheva.
