Búginde memleket tarapynan kitaphalalarǵa úlken qoldaý kórsetilip otyr deýge bolady. Elimizde 11 myńǵa jýyq kitaphana bar desek, onda 300 mıllıonnan astam kitap qory saqtalǵan eken. Almatydaǵy Ulttyq kitaphanyń ózinde 7 mıllıonnan astam kitap qory bar.
Jaqynda Ulttyq kitap kúnine oraı Almaty qalasy Mádenıet basqarmasyna qarasty «Ortalyqtandyrylǵan kitaphana júıesi» KMM-niń №31 kitaphan-bólimshesinde «Qazaq ádebıeti – ǵasyrlar qoınaýynan jetken ádebı mura» taqyrybynda kelýshilerge sheberlik saǵaty ótkizilip, «Kitap – tarıh, shejire!» atty kitap kórmesi uıymdastyryldy.
Bizdiń kitaphanada aıtýly kúnderge, sondaı-aq belgili tulǵalardyń mereıtoılaryna oraı, olardan qalǵan muralardy dáripteý maqsatynda kóptegen sharalar ótip turady. Bul oraıda «Mádenı mura – rýhanı qazyna», «Qoǵam úshin eńbek etý – paryz», «Jyl kitaptaryn birge oqıyq» jáne «Kitaptaǵy qupıalardy bilgim keledi» taqyryptaryndaǵy sharalar buǵan dálel. Ásirese №193 mekteptiń 5-6 synyptarynyń oqýshylary kitaphanaǵa kelip, oqyǵan kitaptaryn ózara talqylap, pikir-saıystarǵa qatysýǵa daǵdylanǵanyn aıtýǵa bolady.
Taıaýda ǵana «Uly Jeńiske máńgilik taǵzym» erlik sabaǵy ótkizilip, «Urpaqqa uran bolǵan Uly Jeńis» taqyryptarynda kórme uıymdastyryldy, Álıa Moldaǵulovanyń týǵanyna 100 jyl tolýyna oraı, «Batyr qyzy halqynyń» taqyrybynda eske alý saǵaty josparlanyp otyr. Budan bólek, qazaqtyń bas aqyny Abaı Qunanbaıulynyń týǵanyna 180 jyl, qazaqtyń kórnekti aqyndary Tumanbaı Moldaǵalıv pen Qadyr Myrza-Áliniń 90 jyldyǵy da eskerýsiz qalmaı, aqyndardyń kitaptary men gazet-jýrnaldar betinde jarıalanǵan maqalalarynan kitap kórmesi uıymdastyrylǵan.
Qazir kitaphana qorynda 6832 kitap bar. Onyń ishinde qazaq tilinde – 1962, orys tilinde – 2939, aǵylshyn, túrik, qyrǵyz, ózbek tilderinde – 44 kitap saqtalǵan. Bıyl qorymyz qosymsha 821 kitappen tolyqty. Tek mektep oqýshylary ǵana emes, túrli sala mamandary men zeınetkerler de kitap alyp oqıdy. Búginde oqyrman sany 13 myńnan asyp, turaqty keletinder myńǵa jýyqtaǵan. Kitaphanada kitaptardan bólek, memlekettik jáne resmı tilde merzimdi baspasózdermen de qamtamasyz etilgen.
Kitaphana ujymy úlken-kishi demeı, jalpy halyqty kitap oqýǵa tarta otyryp, kitapqumarlar qataryn arttyrýdy, balalardyń saýattylyǵy men bilimin jetildirýdi ári tilge degen qurmet pen Otansúıgishtikke tárbıeleýdi kózdeıdi.