Qalamyzdaǵy Ǵ.Músrepov atyndaǵy Qazaq Memlekettik akademıalyq balalar men jasóspirimder teatrynda B.Rımova atyndaǵy Taldyqorǵan drama teatrynyń gastróldik kúnderi bastaldy.
Gastróldik sapar shymyldyǵy keıingi kezde jýrnalısıkamen qatar ádebıet, kıno, teatr salasynda jemisti eńbek etip júrgen talantty qalamger Qanat Tileýhannyń rejıser Farhat Moldaǵalı sahnalaǵan «Medal» qoıylymymen ashyldy. Kúndelikti ómirde ózimiz kýá bolyp júrgen, tipti qalypty jaıtqa aınalǵan ataqqumarlyq, maqtansúıgishtik, dańǵoılyq sıaqty jappaı beleń alǵan keseldi barynsha shynaıy sýrettegen shyǵarma kórermenge saýndrama janrynda usynyldy.
«Spektáklde búgingi ómir shyndyǵy bolýy kerek. Kórermen ózin kórý úshin de teatrǵa barýǵa tıis. «Medal» saýndramasy – bizdiń qoǵam. Kóp eldiń basynan osyndaı oqıǵa ótti. Tek dekorasıasy, kostúmy, rekvızıti bólek. Farhad Moldaǵalı meniń shyǵarmamdy groteske aınaldyrǵan. Kúlki, mazaq, usqynsyzdyq! Qazir «kúndik tirlikpen júrgenderdiń» zamany. Kileń mansap qýǵan pysyqaılar! Sýsyldaǵan jaıdaqtar, paryqsyzdar, qulyq saýǵan pysyqaılar. Medalǵa degen mahabbat sonshalyqty jıirkenishti! Tipti sol medal, ataq, marapatpen adamdy qorlap tastaýǵa da bolady. Avtor men rejıser oıyn tereńdetkeni, materıalǵa óz kózqarasy men azamattyq ustanymyn qosqany úshin teatr akterlaryna myń alǵys! Bul – Farhadtyń qoǵamdaǵy farsqa ıntellektýaldy qarsylyǵy dep bilemin», – deıdi Qanat Tileýhan.
Án, bı, kúı, jyr, drama sabaqtasa órilgen qoıylym mazmunymen ǵana emes, akterlik sheber oıyn, rejıserlik tyń sheshimimen de tánti etti.
Spektákldiń sońyn ala sahnaǵa kóterilgen Halyq ártisi Asanáli Áshimov saparlap kelgen teatr ujymyna aq tilegin arnady.
– Teatr – shyndyqtyń tóri. Bul jerde jalǵan sóz, jasandy sezim bolmaıdy. Tek shynaıylyq, adaldyq pen tazalyq ústemdik qurady. Sahnaǵa shyndyqty shyǵarý – úlken jaýapkershilik. Osy baǵytta adal eńbek etip júrgen óner ujymdaryna alǵysymyz zor, – degen sahna sańlaǵy: «Biz jıi Taldyqorǵanǵa baryp turamyz. Ondaǵy teatr óte jaqsy damyp keledi. Ásirese kórermenniń belsendiligi men yqylasy erekshe. Jetisý oblysynyń bas teatry retinde bul mekeme óńirdiń mádenı tiregine aınalyp otyr. Sahna joly – qurmet pen shyndyq joly. Sol jolda bıikten kórine berińizder! Ónerlerińniń shýaǵy halyqqa jetip, el ıgiligi úshin qyzmet etsin! – dep, ujymǵa tilektestigin bildirdi.
Jetisý oblystyq mádenıet, arhıvter jáne qujattama basqarmasynyń basshysy Qýanysh Súleımenov: «Búgingi sát – biz úshin erekshe qýanysh, júrekke jyly, rýhty kóterer mereke. Almaty – sulýlyq pen mádenıettiń ordasy. Bizdiń teatr ujymy úshin Almaty tórine kelip, osy kıeli sahnada óner kórsetý – úlken mártebe. Sizderdiń qoldaýlaryńyz, ystyq yqylastaryńyz bizge qýat beredi» deı kele, ujym óziniń gastróldik saparyn Almatydan bastaýy tegin emestigin aıtty.
«Almaty – ónerdi ómirlik serik etken Bıken apamyzdyń izi qalǵan, qasıet tunǵan rýhanı orda. Ol kisi osy qalada eńbek ete júrip, qanshama aıshyqty obraz somdady, kórermenniń júreginen oryn aldy. Biz gastróldik saparymyzdy osy kıeli sahnadan bastaý arqyly rýhanı jalǵastyqqa jol ashyp otyrmyz. Halyq ártisi Almahan Kenjebekova, teatr ardagerleri men jas órender, orta býyn jáne teatr basshylyǵy, taıly-taıaǵymyz qalmaı, el úshin, óner úshin qyzmet etýge keldik. Teatr – el rýhynyń aınasy. Búgin biz sol aınadan ózimizdi kórip, ónerimizben bólisip, júrekterińizge jylylyq syılaǵymyz keledi», – dedi Qýanysh Sultanuly.
Qurylǵanyna bıyl 50 jyl bolǵan óner ujymynyń gastróldik sapary budan ári Almaty oblysynda, sondaı-aq Shymkent qalasynda, ary qaraı Syr óńirinde jalǵasady. Gastról repertýaryna sáıkes, búgin Almaty jurtshylyǵyna Dýlat Isabekovtyń «Bonaparttyń úılenýi» shyǵarmasynyń jelisi boıynsha sahnalanǵan, Bolat Uzaqovtyń «Qazaqy komedıasy» usynylmaq.