Ne verte slovam nı svoım, nı chýjım,
verte tolko delam ı svoım, ı chýjım...
Lev Tolstoı
Eger adam adamǵa senbese, onyń haıýannyń qaı jeri artyq? Adamzat osy dúnıege kelgeli bir-birine senim artyp, óz ómirin amanatqa tapsyryp birikti, qorǵandy, tirshilik jasady. Qazaqtyń uǵymyndaǵy amanat osy senimge rıasyz senýge beıim. Senim buzylǵan tusta qyldaı aıyrylysty, ol amanattyń qıanatqa aınalǵany bolatyn...
Sonymen, kópten kútken ózgeristerdiń basty jańalyǵy basty partıa - keshegi Nur Otan-nyń kezekten tys HHİİ sezinde búgingi AMANAT partıasynyń qaıta túleýimen jalǵasty. Qoǵamnyń árbir ekinshisi fılolog hám fálsafashy bolyp partıanyń ataýyn tárjimalap ketti. Durys, másele kemeniń atyn qalaı qoıǵanynda bolyp tur ǵoı. Halyqtyń senimin oıatýǵa jandy jerinen ustaıtyn aýyr uǵymdy bildiretin «amanat» sózi rasymen erekshe tańdap alynǵan.
AMANAT-tyń uǵymy saıası tarıhta ta tańsyq emes.
Esimizde bolsa, Túrkıada Mustafa Kemaldyń tusynda 1923 jyly qurylǵan respýblıkalyq halyqtyq partıasy, keıin eń ejelgi basty partıa retinde qoǵamda qaıta túledi. Partıa kemalızmniń jarqyn ıdeologıasyn jańa zamanǵa beıimdeý úshin, 1967 jyly jańa baǵytta halyqtyń senimin aqtaýda «Senim partıasy» ıaǵnı Güven Partisi bolyp jańardy.
Al Indonezıada 1998 jyly Amıen Raıstyń qurýymen «Ulttyq Amanat partıasy» (Partai Amanat Nasional) quryldy.
Alysqa ketpeı-aq, myna Ýkraınada 2020 jyly «Doverıa» ıaǵnı Senim, Amanat atty saıası partıasy, artynsha depýtattyq toby jasaqtaldy.
Bir sózben aıtqanda, saıasatta senimge, mandatqa, amanatqa ıe bolý atyna da, zatyna da baılanysty ekenin kórsetedi.
Partıanyń sezinde sheshilgen ataýdan ózge, aldaǵy ýaqyttaǵy baǵyt-baǵdarlary da biraz aıqyndalypty. Árıne, partıa Tóraǵasy, Prezıdent Qasym-Jomart Kemelulynyń qoǵamdyq-saıası jáne áleýmettik-ekonomıkalyq reformalaryn tolyq júzege asyrýda "amanattyqtardyń" beldi bekem býyp kirispekke daıyndyǵyn ańǵarý qıyndyq týǵyzbady. Ony elimizdiń túkpir-túkpirinen qatysqan 393 delegattyń ekpininen baıqaldy.
Arasynda Májilis, máslıhat depýtattary, jergilikti qoǵamdyq keńesteriniń belsendi músheleri daýryqpa maqtaý sózden góri pragmatıkalyq kózqarastaryn ortaǵa salyp, usynystaryn qarsha jaýdyrǵanynan, partıa bıliginde saıası renesansynyń ornaǵanyndaı sezim qaldyrdy.
Halyq arasynda túrli oı-pikirler aıtylyp jatyr ǵoı, ol da zańdylyq. Til-kózden saqtasyn dep, taqymyn qysqan kózi tórteý bolǵan qoǵamnyń AMANAT-tyń keleshegine qarabaıyr úmitin úzile jalǵap otyrǵany da anyq. Óıtkeni, senimniń hám amanattyń quny óte joǵary! "Aıtylǵan sóz – atylǵan oq" degen bar, AMANAT-tyń sózinen góri isi mańyzdy halyqqa.
Úmitsiz shaıtan...