Mánerlep syrǵanaýdan Qazaqstan quramasynyń kóshbasshysy Mıhaıl Shaıdorov Boston (AQSH) qalasynda ótip jatqan álem chempıonatynyń kúmis júldegeri atandy.
Qysqa baǵdarlamadan keıin qazaqstandyq sportshy úshinshi orynda turǵan edi. Nátıjesinde ol óz kórsetkishin jaqsartyp, joǵary kóterildi, dep habarlaıdy aqshamnews.kz UOK-ke silteme jasap.
Erkin baǵdarlamada Shaıdorov tóreshilerdiń sheshimi boıynsha 192,70 upaı jınady (jeke rekord). Jalpy esepte ol 287,47 upaıǵa (jeke rekord) qol jetkizip, jarysty ekinshi orynmen aıaqtady.
Álem chempıonatynyń altyn medalin qatarynan ekinshi ret amerıkalyq Ilá Malının jeńip aldy – 318,56 upaı. Al japonıalyq Iýma Kagıama úzdik úshtikti qorytyndylady – 278,19 upaı.
Aıta keteıik, Shaıdorov eresekter arasyndaǵy álem chempıonatynda óz mansabyndaǵy eń úzdik nátıjesin kórsetti. Buǵan deıin onyń qorjynynda jasóspirimder arasyndaǵy álem chempıonatynyń kúmis júldesi bolǵan. Sondaı-aq, bıylǵy maýsymda ol 2025 jylǵy Azıa oıyndarynda qola medal enshilep, Tórt qurlyq chempıonatynda altyn júlde jeńip aldy.
Mánerlep syrǵanaýshy 2026 jylǵy Olımpıada oıyndaryna qatysý normatıvin oryndady. Ol úshin sportshy álem chempıonatynda úzdik 24 sportshynyń qataryna enýi qajet bolatyn.
Qazirgi ýaqytta ISU tarapynan Olımpıadaǵa joldama alǵan sportshylardyń resmı tizimi jarıalanýy kútilýde.