Tólemderi boıynsha stavkalar ózgerissiz qaldy, alaıda 2024 jyldyń 1 qańtarynan bastap elimizde eń tómengi jalaqy (ETJ) mólsheri ózgerdi. Bul birneshe tólemniń kólemine áser etti.
Áleýmettik medısınalyq saqtandyrý qory bıyl biz medsaqtandyrýǵa qansha tóleıtinimiz jóninde habar taratty. Jumys berýshiler qyzmetkerge jalaqynyń 3% mólsherinde aýdarym jasaıdy, dep habarlaıdy almaty-akshamy.kz. Osy oraıda salyq salynatyn aı saıynǵy tabys 10 ETJ-dan (2024 j. 850 000 teńge) aspaýǵa tıis, ıaǵnı jumys berýshiniń eń joǵary tólenetin somasy aıyna 25 500 teńge. Bul qarajat qyzmetkerdiń jalaqysynan ustalmaıdy, ony jumys berýshi kásiporyn esebinen tóleıdi. Al jaldamaly jumyskerler men qyzmetkerler MÁMS-ke aı saıynǵy tabysynyń 2% mólsherinde jarna tóleıdi. Salyq salý obektisi barlyq jumys oryndarynan aıyna 10 ETJ (2024 j. 850 000 teńge) aspaýy tıi. Qyzmetkerdiń jalaqysyna qaraı, tóleıtin eń joǵary jarnasy 17 000. Jeke kásipkerler 1,4 eselengen ETJ-dan 5% tóleıdi. 2024 jyly: (1,4 * 85 000) * 5% = 5 950 teńge. Eger jeke kásipker eseptemeni «nólmen» tapsyrsa, qyzmetin resmı túrde toqtatpasa, onda ol Salyq kodeksiniń talabyna saı jarna tóleýdi jalǵastyrýy kerek. Áıtpese, qaryz paıda bolady. Derbes tóleýshiler eń tómengi jalaqynyń 5% kóleminde, ıaǵnı 4 250 teńge jarna tóleıdi. 1 qańtardan ózin-ózi jumyspen qamtyǵandarǵa eki tásil usynylady: - jeke kásipker retinde tirkelý jáne jarnany JK retinde tóleý; - jarnany derbes tóleýshi retinde tóleý.