2023 jyly ásker qataryn 37 myńnan astam azamat tolyqtyrdy
Shaqyrý sharalary eki kezeńde: kóktem men kúz aılarynda uıymdastyryldy. Áskerı qyzmettiń bedelin arttyrýǵa baǵyttalǵan is-sharalar kesheniniń arqasynda bul naýqandar merziminen buryn aıaqtaldy.
37 myń áskerge shaqyrylýshynyń 16 myńnan astamy Qarýly kúshterge jiberildi. Qalǵan 21 myń azamat Ulttyq ulannyń, Ulttyq qaýipsizdik komıteti Shekara qyzmetiniń, Memlekettik kúzet qyzmetiniń jáne Tótenshe jaǵdaılar mınıstrliginiń áskerı bólimderin tolyqtyrdy, dep habarlaıdy Almaty-akshamy.kz Qorǵanys mınıstrligine silteme jasap.
Qorǵanys mınıstrliginiń múddeli memlekettik organdar qoldaǵan áleýmettik bastamalarynyń qatarynda kredıttik demalystar, merzimdi áskerı qyzmetin ótkergenderge bilim alý jeńildikterin berý jáne sarbazdardy jumysshy mamandyqtaryna oqytý sekildi mańyzdy máseleler bar.
Qazirgi tańda 4 myńnan astam sarbazdyń 1,5 mlrd teńge somasyndaǵy nesıeleri keıinge qaldyryldy. Ótken jyly merzimdi qyzmetin ótegen 615 adam UBT tapsyrmaı, azamattyq jáne áskerı joǵary oqý oryndaryna oqýǵa tústi. Oqý ortalyqtarynda ekonomıkanyń naqty sektorynda suranysqa ıe 15 áskerı-eseptik mamandyq boıynsha 1195 áskerı qyzmetshi daıyndaldy.
Budan ózge de jeńildikter barshylyq. Merzimdi áskerı qyzmettiń áskerı qyzmetshileri memleket esebinen zattaı múlikpen, tamaqpen jáne aı saıynǵy aqshalaı úlespen qamtamasyz etiledi. Sonymen qatar qyzmet kórsetý kezeńinde merzimdi sarbazdar medısınalyq qyzmettiń tolyq spektrin alýǵa quqyly. Jalpy áskerı jarǵylarda aıqyndalǵan tártippen merzimdi qyzmettegi áskerı qyzmetshilerge kótermeleý retinde qysqa merzimdi demalys berilip, jol shyǵyndary memleket esebinen tólenedi.
Áskerı qyzmet merzimi ótkennen keıin nemese densaýlyq jaǵdaıy boıynsha jumystan bosatylǵan kezde olar bir aılyq eseptik kórsetkish mólsherinde jumystan shyǵý járdemaqysyn alady. Jetim balalar men ata-anasynyń qamqorlyǵynsyz qalǵan balalar bes aılyq eseptik kórsetkish mólsherindegi járdemaqymen qamtamasyz etiledi.
Tehnıkalyq, kásiptik, joǵary bilimi bar áskerı qyzmetshiler alty aı qyzmet ótkergennen keıin kelisimshart boıynsha áskerı qyzmetke kirýge quqyly. Ótken jyly bul múmkindikti 852 sarbaz ıelendi. Bul rette oqýǵa túsý jyly 24 jasqa tolmasa, olar jalpy orta bilim bazasynda joǵary, tehnıkalyq jáne kásiptik bilim berý baǵdarlamalaryn iske asyratyn áskerı oqý oryndaryna qabyldanýy múmkin.
Jergilikti áskerı basqarý organdaryn sıfrlyq transformasıalaý sheńberinde 17 jastaǵy jastardy proaktıvti formatta áskerı esepke alý uıymdastyrylǵanyn aıta ketý kerek. Bul óz kezeginde bir mıllıard teńgeden astam búdjet qarajatyn únemdeýge múmkindik beredi. Qyzmetti avtomattandyrý sonymen qatar shaqyrý ýchaskesinen tirkelý týraly kýálikterdi alý qajettiligin joıady. Aldyn ala málimetter boıynsha 2024 jyly 170 myńnan astam adam tirkelýge jatady.