Qujat Senatqa jiberiledi.
Májilistiń jalpy otyrysynda "Qazaqstan Respýblıkasynyń keıbir zańnamalyq aktilerine mindetti áleýmettik medısınalyq saqtandyrý máseleleri boıynsha ózgerister men tolyqtyrýlar engizý týraly" ekinshi oqylymda qabyldandy, dep habarlaıdy inbusiness.kz saıty.
Qujatty depýtat Gúldara Nurym tanystyrdy.
"Zań jobasy memlekettiń mindetti áleýmettik medısınalyq saqtandyrý salasyndaǵy qyzmetiniń quqyqtyq jáne uıymdastyrýshylyq negizderin jetildirýge baǵyttalǵan. Zań jobasy memlekettik bazalyq medısınalyq kómektiń biryńǵaı toptamasyn qalyptastyrýǵa, jumyssyz adamdardyń jáne áleýmettik ál-aýqat deńgeıi daǵdarysty, múshkil adamdardyń medısınalyq kómekke qoljetimdiligin qamtamasyz etýge, sondaı-aq MÁMS júıesine memleket jarnalarynyń mólsherlemelerin kezeń-kezeńimen ózgertýge baǵyttalǵan quqyqtyq normalardy kózdeıdi", - delingen Májilis taratqan habarlamada.
Aqparatqa sáıkes, zańsyz medısınalyq qyzmetti júzege asyratyn densaýlyq saqtaý sýbektileriniń azamattardyń densaýlyǵy men ómirine zıan keltirýin boldyrmaý úshin depýtattar densaýlyq saqtaý salasyndaǵy ýákiletti organǵa tıisti lısenzıa nemese sertıfıkat bolmaǵan jaǵdaıda medısınalyq qyzmet kórsetý salasynda anyqtalǵan buzýshylyqtarǵa jedel den qoıý sharalaryn qoldaný múmkindigimen medısınalyq qyzmet kórsetý salasyndaǵy qadaǵalaý fýnksıasyn berýdi usynady.
Qujatta kórsetilgen negizgi usynystar:
- medısınalyq kómekke alǵashqy júgingen kezde jáne áleýmettik máni bar aýrýlardyń aldyn alý, dıagnostıkalaý jáne olardy emdeý boıynsha qyzmetter kórsetý kezinde medısınalyq-sanıtarıalyq alǵashqy kómekti jáne jekelegen skrınıngterdi TMKKK toptamasynda saqtaý;
- jumyskerdiń aı saıynǵy kirisiniń somasynan MÁMS júıesine aýdarymdardy esepteýge arnalǵan shekti eń tómen jalaqynyń 50 eselengen mólsherinen 20 eselengen mólsherine deıin jáne jumys berýshilerdiń aýdarymdary mólsherinen – eń tómen jalaqynyń 40 eselengen mólsherine deıin tómendetý.
Budan bólek MÁMS júıesiniń tartymdylyǵyn qamtamasyz etý maqsatynda zań jobasynda jarnalardy úzdiksiz tólegen adamdar úshin mindetti áleýmettik medısınalyq saqtandyrý júıesinde medısınalyq kómek alý quqyǵyn olardy tóleý toqtatylǵan sátten bastap alty aıǵa deıin saqtaý usynylady.
Budan basqa, Áleýmettik medısınalyq saqtandyrý qory men densaýlyq saqtaý sýbektileriniń qarjylyq qyzmetiniń ashyqtyǵyn kúsheıtý maqsatynda depýtattar:
- MÁMS júıesindegi qarjy qarajatynyń qozǵalysy týraly málimetterdi resmı ınternet-resýrstarda mindetti túrde jarıalaý;
- qyzmetterdi satyp alý sharty boıynsha mindettemelerdi oryndamaǵan nemese tıisinshe oryndamaǵan kezde densaýlyq saqtaý sýbektilerinen qarajatty qaıtarý boıynsha normalardy qabyldady.