Mamandyq tańdaý – árbir jas úshin mańyzdy kezeńderdiń biri. Alaıda, erekshe qajettilikteri bar balalar úshin bul proses belgili bir qıyndyqtarmen qatar júredi. Osyǵan baılanysty, olarǵa baǵyt-baǵdar berý, yńǵaıly mamandyqtardy usyný – mańyzdy mindetterdiń biri.
№2 arnaıy mektep-ınternat dırektorynyń orynbasary Janar Quttyqadamqyzynyń aıtýynsha, jyl saıyn qaladaǵy birneshe kolej oqytýshylary arnaıy kelip, balalarǵa kásibı baǵdar beredi. Bul kezdesýler barysynda olardyń múmkindikteri eskerilip, qolaıly mamandyqtar týraly tolyq aqparat beriledi.
«Erekshe balalar úshin mamandyq tańdaý ońaı emes. Mysaly, tirek-qımyl apparaty buzylǵan balalarǵa keıbir mamandyqtardy meńgerý qıynǵa soǵýy múmkin. Sondyqtan olar kóbinese Almaty florıstıka koleji men Almaty tehnologıa kolejin tańdaıdy. Bul oqý oryndarynda bizdiń balalarǵa laıyqty mamandyqtar kóp. Ásirese, toqyma, tiginshilik, etikshilik, İT salasy sekildi kásipterge suranys joǵary», – deıdi Janar Quttyqadamqyzy.
Degenmen, erekshe qajettilikteri bar túlekterdiń arasynda medısına, pedagogıka sıaqty salalarda da qyzmet etip júrgenderi az emes. Bul olardyń tek belgili bir sheńberde shektelmeı, óz múmkindikterin tolyqtaı júzege asyrýǵa talpynatynyn kórsetedi.
Qazirgi tańda erekshe balalarǵa arnalǵan mamandyqtar men olardyń eńbek naryǵyna beıimdelýi mańyzdy taqyryptardyń biri bolyp otyr. Sondyqtan, mundaı is-sharalardyń jıi uıymdastyrylýy – olardyń bolashaqqa senimmen qadam basýyna úlken múmkindik beredi.