Qazirgi tańda eńbek naryǵyndaǵy básekelestik joǵarylap, jumys berýshiler tájirıbeli mamandardy kóbirek izdeıdi. Alaıda, jańadan oqý ornyn támamdaǵan túlekter úshin jumysqa ornalasý ońaı emes. Olardyń bilimi jetkilikti bolǵanymen, tájirıbeniń azdyǵy kedergi keltiredi.
«Prınt Azıa» tıpografıasynyń dırektory Tımýr Salımniń aıtýynsha, jas mamandardy qoldaý – kez kelgen salanyń damýy úshin mańyzdy.
«Biz jyl saıyn kóptegen jas túlektermen kezdesemiz. Olardyń boıynda úlken ynta, jańa ıdeıalar bar, biraq jumys tájirıbesiniń joqtyǵy keıde kedergi bolyp jatady. Sondyqtan biz jas mamandardy qoldap, olardy óndiristik bazaǵa shaqyryp, tájirıbe jınaqtaýyna múmkindik beremiz», – deıdi ol.
Jumys berýshiler úshin jas mamandardy jumysqa alý keıde táýekelmen baılanysty bolýy múmkin. Sebebi olardy oqytý, beıimdeý belgili bir ýaqyt pen resýrs talap etedi. Biraq tájirıbe kórsetkendeı, jas mamandardyń jańa kózqarasy men shyǵarmashylyq áleýeti kompanıalardyń damýyna oń áser etedi.
Sondyqtan, jas túlekterdi tek jumys tájirıbesiniń bolmaýyna qarap baǵalaý durys emes. Olardyń kásibı daǵdylaryn damytýǵa múmkindik berý – bolashaqta salanyń turaqty damýyna septigin tıgizedi. Jas mamandarǵa berilgen árbir múmkindik – jańa jetistikterge bastar jol.