Osy aıdyń basynan beri kartoptyń baǵasy 5%-ǵa tómendedi.
Qazaqstanda kartop qory jetkilikti. Bul týraly Aýyl sharýashylyǵy mınıstri Erbol Qarashókeev Ortalyq komýnıkasıalar qyzmetinde ótken brıfıń barysynda aıtty, dep habarlaıdy Almaty-akshamy.kz Ortcom.kz cilteme jasap.
Mınıstr brıfıń barysynda ákimdikterdiń aqparaty súıenip, búgingi kúni kartop qory jetkilikti ekenin aıtty. Onyń aıtýynsha, maýsym aıynan bastap erte pisetin kartopty jınaý bastaldy. Erte pisetin kartoptyń jalpy ónimi búginde 270 myń tonnany quraıdy. Tamyzdyń birinshi jartysynda 7,8 myń tonna jınaý josparlanǵan.
Mınıstrdiń sózine júginsek, erte pisetin kartop óniminiń jınalýy ishki naryqty molyqtyrýǵa jáne kartop baǵasynyń turaqtanýyna yqpal etti. Osy aıdyń basynan beri kartoptyń baǵasy 5%-ǵa tómendedi, 184 tg/kg-nan 179 tg/kg-ǵa deıin.
«Kartop boıynsha ishki naryqtyń aılyq qajettiligi 153 myń tonnany quraıdy. Qyrkúıekten bastap kúzgi kartopty jınaý bastalady, onyń kólemi 4 mln tonnadan asady, bul ishki naryqtyń qajettiligin tolyq qamtamasyz etedi jáne belgili bir kólemdi eksportqa jóneltýge múmkindik beredi. Qyryqqabat pen sábiz boıynsha da jaǵdaı turaqty. Iaǵnı, erte qyryqqabat pen sábiz kólemi kúzgi egin jınaǵanǵa deıin ishki naryqty qamtamasyz etý úshin jetkilikti. Sonymen qatar tamyzdyń sońǵy onkúndiginen bastap kókónis ónimderiniń kúzgi ónimi naryqqa shyǵady dep kútilýde», - dedi Erbol Qarashókeev.