Zaýyttyń jumysy qazir ýaqytsha toqtap tur.
Almaty oblysy Shalqar aýylynyń turǵyndary úı mańynda qazylyp jatqan káriz qudyǵyna qarsylyǵyn bildirdi, dep habarlaıdy Almaty-akshamy.kz Almaty.tv silteme jasap.
Halyqtyń aıtýynsha, 10 sotyq jerdi alyp jatqan qazanshuńqyrǵa osynda ornalasqan sharap zaýyty qaldyq sýlaryn tókpekshi. Al jergilikti ákimdik mekemeniń bul áreketi zańsyz, endi qajetti tekseris jumysyn júrgizý kerek deıdi.
«Qaldyqtardy osy kárizge tógedi. Bul jer tolyp qalyp edi, janynan taǵy tesip qoıǵan, qazir kóresizder. Qaldyqtar jaıylymǵa aǵyp barady. Áý basta basqa jerge tógetin. Halyq ıisine shydamaı, shýlaǵan soń, osy jerdi paıdalanyp júr», – dedi Shalqar aýylynyń turǵyny Dáýren Almabekov.
Al 150 adamǵa jumys berip otyrmyn degen mekeme basshylyǵy qazylǵan jerdiń zańdy ıesimiz dep qujat kórsetti. Onyń ústine qurylys tolyq aıaqtalǵan joq, bitken soń bárin qorshap tastaımyz dep sendirdi.
«Hımıa joq. Bizderde hımıa bolmaıdy. Tek bótelke jýamyz, sonyń sýy keledi. Bizderde qujat bar. 2009 jyly 71 sotyq jerdi satyp aldyq», – dedi sharap zaýytynyń ókili Arıf Abdýllauly.
Jergilikti ákimdik ókilderi Shalqar aýylynda qazylyp jatqan sharap zaýytynyń káriz qurylysyn zańsyz dep otyr. Óıtkeni atalǵan qurylysqa ruqsat almaǵanyn aıtady.
«Qurylys zańsyz. Eshqandaı ruqsat qaǵazy joq», – dedi Qarasaı aýdany sáýlet jáne qala qurylysy bóliminiń bas mamany Dármen Japarov.
«Ekologıa departamenti kelip tekserdi. Biz turǵyndardyń aryz-shaǵymyn alamyz. Sosyn quzyrly organǵa halyqtyń aryzyn tirkep, hat joldaımyn.Bul kisilerge shara qoldanady», – dedi Jandosov aýyldyq okrýginiń ákimi Almas Jambýov.
Kópshilik shaǵym aıtqan zaýyttyń jumysy qazir ýaqytsha toqtap tur. Endi ondaǵy jumysshylar da jumyssyz qalamyz dep qorqady. Al jergilikti bılik ókilderi aýyl azamattarynyń shaǵymyn quzyrly mekemelerge tapsyrdyq, endi jaýabyn kútemiz dep qysqa qaıyrdy.