Qalaǵa 335 elektr jáne gaz avtobýstary satyp alyndy.
Mamandar Qazaqstan astanasy men Almatynyń ekologıasyn jaqsartý úshin qandaı sharalardy iske asyryp jatqandaryn aıtty, dep habarlaıdy Almaty-akshamy.kz.
«2020-2021 jyldar aralyǵynda Ekologıa, geologıa jáne tabıǵı resýrstar mınıstrligi negizgi ekologıalyq problemalardy talqylaý boıynsha halyqpen birneshe kezdesýler ótkizdi. Talqylaý qorytyndysy boıynsha, 5 bloktan jáne 22 is-sharadan turatyn ekologıalyq jaǵdaıdy jaqsartý boıynsha, ıaǵnı atmosferalyq aýa sapasyn arttyrý, aýa aınalymyn jaqsartý, gazdandyrý, avtokólik, kógaldandyrýdy odan ári jandandyrýǵa baılanysty Jol kartasy ázirlenip, bekitildi», - delingen Ekologıa mınıstrliginiń baspasóz qyzmetiniń habarlamasynda.
Mamandardyń aıtýynsha, búgingi kúni Jol kartasynda qarastyrylǵan 22 is-sharanyń 13-i oryndaldy. Mysaly, Nur-Sultan qalasy boıynsha 1-JEO jáne 2-JEO-ǵa sý jylytý qazandyqtaryn tabıǵı gazǵa aýystyrý jáne iske qosý arqyly gaz qubyrlaryn tartý jumystary aıaqtaldy.
Gazdandyrý boıynsha elordada 1-shi kezektegi jumystar aıaqtaldy, tolyq gazdandyrýdy 2023 jyly aıaqtaý josparlanyp otyr.
Almaty qalasy boıynsha 2-JEO jáne 3-JEO qazandyqtardy gazǵa aýystyrý arqyly jańǵyrtý týraly sheshim qabyldandy. «Qorshaǵan ortaǵa áserdi barynsha azaıta otyryp, Almaty 2-JEO jańǵyrtý» jobasynyń TEN-ine oń qorytyndy alyndy jáne jobany iske asyrý boıynsha jumys bastaldy. Bul shyǵaryndylardy 83% - ǵa, ıaǵnı 37,8-den 6,0 myń tonnaǵa deıin qysqartýǵa múmkindik beredi.
Sonymen qatar, atmosferaǵa zıandy shyǵaryndylardy azaıtý úshin Almatyda dızeldik qoǵamdyq kólik satyp alýǵa tyıym salyndy jáne 335 elektr jáne gaz avtobýstary satyp alyndy. Jáne janarmaı quıý stansıalaryndaǵy otyn sapasyna jáne jalpy avtokólikti tehnıkalyq baıqaýdan ótkizýge qoıylatyn talaptar kúsheıtildi. Kirý jáne shyǵý joldarynda 21 «Sergek» júıesi beketteri jáne 19 ekopost ornatylǵan, olar Almaty qalasynyń polısıa departamentine shyǵaryndylardy tirkeý jáne derekterdi berý úshin «Sergek» júıesimen biriktirilgen.
Aýmaqtardy kógaldandyrý boıynsha ákimdikter jasyl jelekerdi tolyqtaı teseredi, qalanyń jasyl jelekteriniń tizilimi engiziletin bolady, onda jasyl jelekterdiń tıpteri, túrlik quramy, alańynyń kólemi, jaı-kúıi jáne ornalasýy týraly derekter turaqty negizde jańartylatyn bolady. Tıisti zańnamaǵa aǵashtardy zańsyz kesý erejelerine ózgerister engizildi, ol boıynsha aǵashtardy zańsyz keskeni úshin jıyrma jáne otyz ese mólsherde ótemdik aǵash otyrǵyzý kózdelgen, al olardyń zańsyz kesilgeni úshin ákimshilik jaza bes esege deıin ulǵaıtyldy.
Aıta ketý kerek, jel aǵynyn zertteý maqsatynda Almaty qalasynyń ákimdigi jel rejımin zertteýdi kompúterlik modeldeý boıynsha eksperımenttik jumys bastady, sondaı-aq jel baǵytyn eskere otyryp, qurylystyń bas josparyna ózgerister engizý boıynsha usynystar ázirlenýde.
Osylaısha, jańa Ekologıalyq kodekske sáıkes ákimdikter endi atmosferalyq aýa nasharlaǵan jaǵdaıda 3 jyl ishinde kólik quraldarynyń kirýine shekteýler engizý, al qolaısyz meteojaǵdaılar týyndaǵan kezde, atmosferalyq aýaǵa lastaýshy zattardyń shyǵarylýyn retteý jónindegi ýaqytsha sharalardy engizý ókilettikterine ıe.