Elde qaterli isikke shaldyqqandar sany úsh jylda 14%-ǵa ósken.
Senat depýtaty Ábdáli Nuralıev qalalardaǵy ekologıanyń nasharlaýy adamdardyń ómir súrý sapasy men ahýalyna teris áser etetinin atap ótti, dep habarlaıdy Almaty-akshamy.kz Elorda.info-ǵa silteme jasap.
«Ekologtar qalalarda atmosferanyń joǵary deńgeıde lastanýy saldarynan qurban bolatyndar jylyna orta eseppen 2% kóbeıip bara jatqany jaıynda derekter keltirip otyr. Al úsh jyl ishinde qaterli isikke shaldyqqan naýqastar sany 14%-ǵa ósken», – dedi ol.
Ásirese, respýblıkalyq mańyzy bar jáne ónerkásibi bar qalalarda jaǵdaı nasharlap barady. Senator osyǵan baılanysty óziniń depýtattyq saýalynda jaǵdaıdy jaqsartý úshin jumysqa qarqyn berý qajettigin aıtty.
«Qazaqstan Parıj kelisimine oraı 2030 jylǵa qaraı parnıktik gazdardyń shyǵarylýyn 15%-ǵa qysqartýdy mindetine alǵan. Esepti kezeńde nysanaly ındıkatorlardyń oryndalmaýyna baılanysty ekologıa máseleleriniń Jol qartalary pysyqtalyp, naqtylanýy kerek jáne is-sharalardyń nátıjeli júzege asyrylýy tıis dep sanaımyz. Sondaı-aq, qazirgi ýaqytta Qazaqstan kómirtekti beıtaraptanýdyń 2060 jylǵa deıingi doktrınasymen jumystar júrgizýde. Bul el múddesi úshin, tabıǵatqa jáne klımatqa uqypty qaraýdyń negizin qalaýy kerek», – dedi senator.