Búgin Májiliste "Aq jol" partıasynyń jańa depýtaty Oljas Nuraldınov ant berdi, - dep habarlaıdy Aqshamnews.kz tilshisi.
Parlament Májilisiniń jańa sesıasyndaǵy alǵashqy jalpy otyrysy "Aq jol" fraksıasyndaǵy ózgeristerden bastaldy. Májilis spıkeri Erlan Qoshanov depýtattyq ókilettigin toqtatqan Erjan Beısenbaevqa atqarǵan eńbegi úshin alǵys bildirdi.
"Aq jol" demokratıalyq partıasynyń sheshimimen áriptesimiz Nurjan Beısenbaevtyń ókilettigi toqtatyldy. Barlyq depýtattyq korpýs atynan Erjan Almabekulyna atqarǵan jemisti jumysy úshin alǵysymyzdy bildiremiz", – dedi Qoshanov.
Spıkerdiń aıtýynsha, Ortalyq saılaý komısıasynyń qaýlysymen "Aq jol" demokratıalyq partıasy atynan Májilis depýtaty bolyp Oljas Nuraldınov tirkeldi.
Jańa depýtat Konstıtýsıaǵa ant berdi.
"Qazaqstan halqyna adal qyzmet etýge, Qazaqstan Respýblıkasynyń tutastyǵy men táýelsizdigin nyǵaıtýǵa, onyń Konstıtýsıasy men zańdaryna qatań baǵynýǵa, depýtat retinde ózime júktelgen mindetterge adal bolýǵa ant etemin", – dedi Oljas Nuraldınov.
Nuraldınov Májilistegi Qarjy jáne búdjet komıtetiniń múshesi bolyp saılandy.
Eske sala keteıik, tamyzdyń aıaǵynda "Aq jol" partıasynyń tóraǵasy Azat Perýashev jýyrdaǵy plenýmda Erjan Beısenbaev depýtattyq ókilettigin toqtatqanyn habarlaǵan edi. Ol bosap qalǵan depýtattyq mandatty partıanyń Almaty qalalyq fılıalynyń tóraǵasy Oljas Nuraldınovqa berý týraly sheshim qabyldaǵan.