Keıbir óńirlerde tórt, endi birinde bes búleten beriledi.
OSK múshesi Sabıla Mustafınanyń aıtýynsha, búletenderdi daıyndaýǵa 532,2 mıllıon teńge jumsalady, dep habarlaıdy Almaty-akshamy.kz
Onyń aıtýynsha, Májilis pen máslıhat depýtattarynyń saılaýyna bes túrli búleten daıyndalady. Onyń ekeýi Májilis saılaýynda daýys berý úshin ázirlenedi. Keıbir óńirlerde tórt, endi birinde bes búleten beriledi.
«Iaǵnı, eger siz Astana turǵyny bolsańyz, saılaý kúni tórt búleten alasyz. Ekeýi Májilis, ekeýi qalalyq máslıhat depýtattaryn saılaýǵa. Árbir óńirde saılaýshylar sany ártúrli. Ár óńir máslıhat saılaýyna búletenderdi ózderi ázirleıdi. Biz Májilis saılaýyna eki túrli búleten daıyndaımyz», - dedi Mustafına Ortalyq saılaý komısıasynda ótken brıfıńte.
Ol, 2023 jylǵy 1 qańtardaǵy jaǵdaı boıynsha, elimizde 11 mıllıonnan astam saılaýshy bar ekenin atap ótti. Zań boıynsha, búleten sany barlyq saılaýshy sanyna +1 prosent artyq daıyndalady.
«Bir búletendi ázirleý ortasha eseppen elimizde 22 teńge turady. Keıbir óńirlerde qymbat, keıbirinde arzan. Biz búdjettik ótinimdi josparlaǵanda, osy baǵany aldyq. Nátıjesinde Májilis saılaýyna 24 192 340 dana búleten kerek. Nege? Eldegi saılaýshylar sany ekige kóbeıtiledi, óıtkeni eki búleten daıyndalady. Oǵan zań boıynsha artyq daıyndalatyn bir prosent qosylady. Sol sebepti búleten ázirleýge jumsalatyn jalpy soma - 532,2 mıllıon teńge. Bul - bizdiń josparly esepteýimiz», - dep túsindirdi Mustafına.
OSK músheleri aldaǵy saılaýǵa daıyndalatyn barlyq búletende «bárine qarsymyn» tarmaǵy bolatynyn atap ótti.
Eske salsaq, Májilis jáne máslıhat depýtattarynyń saılaýy 19 naýryzda ótedi. Kandıdattardy usyný búgin, 20 qańtarda, bastaldy. Qazaqstandyqtar saıası partıalardan kandıdat bola alady nemese ózin-ózi usyna alady.