Jobanyń maqsaty – halyqty aqparattandyrý.
Elimizde psıhologıalyq kómekke muqtaj turǵyndar úshin sapaly aqparattyq qyzmet kórsetetin 3580 call- ortalyǵy iske qosyldy, dep habarlaıdy Almaty-akshamy.kz.
Eger kúızelis qajytyp, mazasyz kúı degbirińizdi qashyryp, ómirden túńilip júrseńiz, 3580 nómirine jedel habarlasyńyz. Bul joba «Qazaqstan Respýblıkasynda psıhıkalyq densaýlyqty saqtaýdyń biryńǵaı aqparattyq qyzmetin pılottaý» dep atalady. Byltyr 23 jeltoqsanda Almaty, Taraz jáne Semeı qalalarynda call-ortalyqtary jumysyn bastady.
Almaty qalasy, Jambyl jáne Abaı oblystarynyń Psıhıkalyq densaýlyq ortalyqtary men osy úsh óńirdiń Jastar medısınalyq ortalyqtarynyń qyzmetteri biryńǵaı aqparattyq júıege biriktirilip, halyqqa psıhıkalyq densaýlyq salasy boıynsha aqparattyq qyzmet kórsetip jatyr.
«Osy jobada psıhologıalyq kómek kórsetetin 25 maman Respýblıkalyq psıhıkalyq densaýlyq ǵylymı-praktıkalyq ortalyǵynda "Qashyqtan psıhologıalyq keńes berýdiń teorıalyq jáne praktıkalyq negizderi" boıynsha bilim alyp, kásibı bilimin jetildiretin trenıńterde shyńdaldy. Buǵan qosa, suraq-jaýap boıynsha mamandarǵa arnalǵan bilim bazasy ázirlendi. Joba Respýblıkalyq psıhıkalyq densaýlyq ǵylymı-praktıkalyq ortalyǵy, Ulttyq qoǵamdyq densaýlyq saqtaý ortalyǵy jáne Dúnıejúzilik densaýlyq saqtaý uıymynyń Qazaqstandaǵy eldik keńsesiniń tehnıkalyq qoldaýymen dúnıege keldi. Árbir uıym DDU Eýropalyq óńirlik búrosymen kompúterlik tehnıkany óteýsiz týraly kelisimge qol qoıdy. Jumys oryndaryn qural-jabdyqpen jabdyqtaý máselesi sheshildi. Bul - turǵyndardyń psıhıkalyq densaýlyq boıynsha aqparatty jedel jáne sapaly maǵlumatpen qamtamasyz etý maqsatynda ashylǵan biryńǵaı ortalyq. Árbir qońyraý shalǵan adam jaıly málimet qupıa saqtalady. Sondyqtan qınalǵanda 3580 nómirine habarlasyp, psıhologıalyq kómekke júginińizder», - deıdi Respýblıkalyq psıhıkalyq densaýlyq ǵylymı-praktıkalyq ortalyǵy bas dırektory Qýanysh Altynbekov.
Jobanyń maqsaty - jurtshylyqtyń psıhıkalyq densaýlyq saqtaý salasy boıynsha qyzmetke qoljetimdiligin arttyryp, halyqty aqparattandyrý. Ári Respýblıkalyq psıhıkalyq densaýlyq ǵylymı-praktıkalyq ortalyǵynyń saıtynda qashyqtan psıhologıalyq kómek kórsetý tetikteri ázirlenip jatyr. Sonymen qatar pılottyq joba aıaqtalǵannan keıin onyń qyzmetine taldaý jasaý arqyly qyzmetin damytyp, osy jyly elimizdiń barlyq óńirinde biryńǵaı aqparattyq qyzmetin ashý josparlanyp otyr.