Bul komısıa 1920-1950 jyldardaǵy saıası qýǵyn-súrgin qurbandaryn aqtaý máselelerimen aınalysýda.
Álıhan Smaıylov 12 jeltoqsandy – Alash kúni dep belgileý jónindegi bastamany Saıası qýǵyn-súrgin qurbandaryn tolyq aqtaý jónindegi memlekettik komısıanyń qaraýyna usynbaq, dep habarlaıdy Almaty-akshamy.kz
Prezıdenttiń Jarlyǵymen saıası qýǵyn-súrgin qurbandaryn tolyq aqtaý boıynsha qurylǵan memlekettik komısıa jumys istep jatyr. Ol komısıa óz quzyretine sáıkes 1920-1950 jyldardaǵy saıası qýǵyn-súrgin qurbandaryn tolyq, zańdy jáne saıası turǵydan aqtaý máselelerimen aınalysýda.
«Jyl saıyn «Aq jol» partıasynyń bastamasymen uıymdastyrylatyn «Alashqa taǵzym» sherýi men jyldaǵy dástúr boıynsha 31 mamyr – Saıası qýǵyn súrgin jáne asharshylyq qurbandaryn eske alý kúnine oraı joǵary deńgeıde is-sharalar uıymdastyrylyp jatyr. Aldaǵy ýaqytta kóterilgen másele saıası qýǵyn-súrgin qurbandaryn tolyq aqtaý jónindegi memlekettik komısıanyń qaraýyna usynylatyn bolady», - deıdi Álıhan Smaıylov.
Bul bastamany depýtat Berik Dúısenbınov kótergen bolatyn.
Ol óz sózinde «is júzinde handyq úlgidegi ydyrap ketken Qazaq memlekettiligin qaıta jańǵyrtýda, ıaǵnı, búgingi táýelsizdiktiń negizin qalaýda HH ǵasyrdyń basynda zamanaýı Qazaq memleketin qurýǵa umtylys jasap, bilim men qajyr-qaıratyn salyp, osy jolda shahıd bolǵan Ult kósemderiniń, Alash Respýblıkasy arystarynyń rolin erekshe atap ótýimiz kerek. Bıyl Alash Respýblıkasynyń qurylǵanyna 105 jyl toldy. Esterińizge sala keteıin, 29 maýsymda «Aq jol» fraksıasy bul datany memlekettik deńgeıde atap ótýdi talap etken depýtattyq saýal joldaǵan bolatyn. Alaıda, Úkimet bul máseleni ókiletti mınıstrlikterge tapsyrǵany týraly júre jaýap berdi. Sonymen, ókinishke qaraı, bul tarıhı data taǵy da ataýsyz qaldy. Bul mereıli kúndi tek alashtanýshylar men bizdiń «Aq jol» partıasy ǵana túrli is-shara ótkizip, atap ótti. Búginde tarıhı ádildikti ornatatyn kún jetti dep sanaımyz. Tarıh taǵylymyn urpaqqa nasıhattaý maqsatynda alashtanýshy ǵalymdardyń bastamasyn qoldaı otyryp, Táýelsizdik kúniniń qarsańyndaǵy 12 jeltoqsandy – tarıhı qujattarmen dáleldengen Alash Respýblıkasynyń qurylǵan kúni retinde – «Alash kúni» dep resmı belgileýdi jáne jyl saıyn memlekettik deńgeıde atap ótýdi suraımyz», - degen edi.