Ázirlengen zań jobasynyń maqsaty jer zańnamasyn jetildirý bolyp tabylady.
QR Parlamenti Májilisiniń depýtattary plenarlyq otyrysta «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy Almaty-akshamy.kz Aýyl sharýashylyǵy mınıstrliginiń baspasóz qyzmetine silteme jasap.
Qujatty QR Aýyl sharýashylyǵynyń birinshi vıse-mınıstri Aıdarbek Saparov tanystyrdy. Ol ázirlengen zań jobasynyń maqsaty – jer zańnamasyn jetildirý, aýyl sharýashylyǵy maqsatyndaǵy jerlerdi jalǵa berý ınstıtýtyn retteý jáne jerdi paıdalaný men qorǵaýǵa memlekettik baqylaýdy kúsheıtý dep atap ótti.
«Zań jobasynda qazaqstandyqtar men qazaqstandyq zańdy tulǵalarǵa aýyl sharýashylyǵy maqsatyndaǵy jerlerdi 49 jylǵa deıingi uzaq merzimdi jalǵa berý, jaldaý merzimi aıaqtalǵanda, onyń merzimin qaıtadan uzartýdyń basym quqyǵy, jer paıdalanýshylar arasynda aýyl sharýashylyǵy maqsatyndaǵy jerdi paıdalaný quqyǵyn memleketten satyp almaı ıelikten shyǵarý qarastyrylady. Bul rette paıdalaný merzimi keminde 5 jyl jáne jer qatynastary jónindegi ýákiletti organdy habardar etýge mindetti bolady», - dedi zań jobasyn depýtattarǵa tanystyrǵan birinshi vıse-mınıstr.
Budan bólek, oblystardyń, respýblıkalyq mańyzy bar qalalardyń, astananyń aýmaqtyq bólimsheleri qurylyp, jerdi paıdalaný men qorǵaýdyń memlekettik baqylaý qyzmetteri ortalyq ýákiletti organ vedomstvosyna qaıtarylatyn boldy.
Sonymen birge, zań jobasynda «baý-baqsha sharýashylyǵyna» jáne «saıajaı qurylysyna» aýyl sharýashylyǵy maqsatyndaǵy jerlerdiń nysanaly maqsatyn ózgertýge tyıym salý, aýyl sharýashylyǵy maqsatyndaǵy jerlerdi jeke menshikke berý jónindegi moratorııdiń merzimin 2026 jyldyń 31 jeltoqsanyna deıin uzartý, berilgen aýyl sharýashylyǵy maqsatyndaǵy jer ýchaskeleri týraly málimetterdi ashyq ári qoljetimdi bolý úshin Memlekettik jer kadastry avtomattandyrylǵan aqparattyq júıesiniń ınternet-resýrsynda jarıalaý máseleleri qarastyrylǵan.
Aıdarbek Saparov ázirlengen zań jobasyn qabyldaý nátıjesinde jalǵa alynǵan aýyl sharýashylyǵy maqsatyndaǵy jerlerdi ekonomıkalyq aınalymǵa tartylatynyn, jergilikti halyqtyń jaıylymdyq jerlerge degen qajettiligin qanaǵattandyrylatynyn, aýyl sharýashylyǵy maqsatyndaǵy jer ýchaskeleri boıynsha aqparattyń qoljetimdiligi men ashyqtyǵy qamtamasyz etilip, áleýmettik-ekonomıkalyq turǵydan tıimdi bolatynyn aıtty.
«Sóz joq, jer zańnamasyna talqylanǵan túzetýlerdi engizý agroónerkásip keshenin turaqty damytýǵa berik negiz bolady. Óıtkeni, jer máseleleri – aýyl sharýashylyǵy ekonomıkasyn damytýdyń negizgi faktory. El Prezıdenti Úkimet aldyna birqatar mindetter qoıdy. Ol mindetterdi biz agroónerkásip keshenin damytýdyń 10 jylǵa arnalǵan uzaq merzimdi tujyrymdamasyn jáne AÓK damytý jónindegi 2021-2025 jyldarǵa arnalǵan Ulttyq jobany qabyldaý arqyly iske asyrýdy josparlap otyrmyz», - dedi birinshi vıse-mınıstr Aıdarbek Saparov.