Qyzmetin úzdik atqarǵan aýdandar men qalalardyń ákimdikterine birqatar komýnaldyq tehnıka syıǵa tartyldy.
Oblys ákiminiń birinshi orynbasary Lázzat Turlashovtyń tóraǵalyǵymen onlaın rejımde ákimdik otyrysy ótip, onda 2020-2021 jyldardaǵy jylytý maýsymynyń qorytyndysy jáne aldaǵy jańa jylytý maýsymyna daıyndyq barysy qaraldy, dep habarlaıdy Almaty-akshamy.kz aımaq basshysynyń baspasóz qyzmetine silteme jasap.
Aldymen oblystyq energetıka jáne turǵyn úı-kommýnaldyq sharýashylyq basqarmasynyń basshysy Baǵlan Tánekenov baıandama jasady.
Baıandamashynyń aıtýynsha, ótken jylytý maýsymyna daıyndyqqa jáne ony ótkizýge búdjetten 15,4 mlrd. teńge bólingen. Jylytý maýsymynyń sapaly júrgizilýi úshin 35 qazandyqtyń negizgi jáne qosalqy jabdyqtary, 64,3 shaqyrym jylý jelisi, 13,7 myń shaqyrym elektr jelisi jáne ártúrli kerneýdegi 3016 transformatorlyq qosalqy stansıalar jóndelgen. Búgingi kúni oblys boıynsha jylýmen jabdyqtaýdy 35 ortalyqtandyrylǵan qazandyq júzege asyrsa, sonyń 16-sy kómirmen, gazben, 3-eýi mazýtpen jumys isteıdi.
2020 jyly jylýmen jabdyqtaýdyń 16 jobasy iske asyrylyp, oǵan 7 mlrd. teńge bólingen. Sonyń ishinde 3,7 mlrd. teńgesi «Jumyspen qamtý jol kartasy 2020» baǵdarlamasy arqyly qaralǵan. Baǵlan Tánekenov óz sózinde qazandyqtardy gazǵa aýystyrý, blokty-modýldi qazandyqtar ornatý isteriniń júıeli júrip jatqanyn da aıtty.
Sonymen qatar keıbir tehnologıalyq zań buzýshylyqtar, halyqty elektr energıasymen, sýmen jáne ortalyq jylýmen úzdiksiz qamtamasyz etýdegi birqatar problemalarǵa da toqtaldy. Máselen, ótken jylytý maýsymy kezeńinde Alakól, Eńbekshiqazaq, İle, Talǵar aýdandary men Taldyqorǵan, Qapshaǵaı qalalarynyń turǵyndarynan páterlerdegi temperatýranyń tómendigine qatysty shaǵymdar túsken.
«Sondyqtan kemshilikterdi boldyrmas úshin, aýdan, qala ákimdikteri jylytý maýsymyna daıyndyq jumystaryn kúsheıtip, sapaly jáne ýaqtyly daıyndyq júrgizýi kerek. Komýnaldyq kásiporyndar men búdjettik sektorǵa qajetti otyn mólsheri aldyn ala daıyndalýy tıis. Konkýrstyq rásimderdi aıaqtap, jazǵy ýaqytta tasymaldaýdy qamtamasyz etý kerek. Densaýlyq saqtaý obektilerin qosymsha syıymdylyqpen qamtamasyz etý qajet. Komýnaldyq jáne ıesiz elektr júıelerine shuǵyl túrde quqyq belgileıtin qujattardy daıyndap, olardy energıa berýshi uıymdardyń balansyna ótkizý qajet», - dedi Baǵlan Tánekenov.
Sol sıaqty aldaǵy 2021-2022 jyldardaǵy jylytý maýsymyna daıyndyq sharaly jaıly da baıandady. Máselen, 2021-2022 jyldardaǵy jylytý maýsymyna búdjetten 13,7 mlrd.teńge qarastyrylǵan. Al jylýmen jabdyqtaýdyń 4 jobasyn iske asyrýǵa 3,26 mlrd.teńge bólingen. Búdjettik uıymdar úshin 25,1 myń tonna kómir, 4,6 myń tonna pellet jáne 25,9 mln. lıtr dızel otyny satyp alynady. Jylytý maýsymy bastalǵanǵa deıin Taldyqorǵan qalasynyń 2 qazandyǵyn gaz júıesine aýystyrý josparlanýda, oǵan oblystyq búdjetten 2,6 mlrd.teńge bólindi.
Basqarma basshysynyń málimetine súıensek, búgingi kúnge oblysta tabıǵı gazǵa 1,2 mln. adam qol jetkize alady. Bıylǵy jyly búdjet esebinen 19 eldi mekendi gazdandyrý josparlanyp, oǵan 6,4 mlrd. teńge bólingen.
Negizgi habarlamadan keıin aýdan, qalalardaǵy jylytý maýsymyna daıyndyq máseleleri jóninde Taldyqorǵan qalasy ákiminiń orynbasary Asqar Begmanov, Tekeli qalasy ákiminiń orynbasary Eldos Myrzabek, oblystyq densaýlyq saqtaý basqarmasy basshysynyń orynbasary Arman Janseńgirov sóz alyp, mán-jaıdy baıandady.
Ákimdik otyrysynyń sońynda ótken jylǵy jylytý maýsymynyń qorytyndysy shyǵarylyp, úzdikterge syı-sıapat kórsetildi. Atap aıtqanda, Kegen aýdanyna oblys ákiminiń 1-shi dárejeli dıplomy men júk tıegish tehnıka, Talǵar aýdanyna İİ dárejeli dıplom jáne qoqys shyǵaratyn kólik, al úshinshi orynǵa ıe bolǵan óńirler retinde Eńbekshiqazaq jáne Uıǵyr aýdandary atalyp, olarǵa da arnaıy dıplomdar men traktorlar berilgeni aıtyldy.
«Ótken jyldyń jylytý maýsymy ýaqytynda qabyldanǵan sharalardyń arqasynda shtattyq rejımde ótti. Endi alda kelesi jylytý kezeńine daıyndyqty jedeldetý mindeti tur. Ásirese, búdjettik sala nysandaryna dızel otynynyń der kezinde tolyq kólemde jetkizilýi basty nazarda bolýy kerek. Jylytý maýsymy bastalǵanǵa deıin búdjettik sala nysandarynda qazandyqtardy gazǵa aýystyrý, jańǵyrtý jáne shyǵarý jumystary da aıaqtalýy tıis. Energetıka jáne turǵyn úı-kommýnaldyq sharýashylyq basqarmasy, Qarasaı, Eńbekshiqazaq, Panfılov, Uıǵyr aýdandarynyń ákimderi, kúzge deıin 36 blokty-modýldi qazandyqty ornatyp, múlik ıeleriniń birlestigin quryńyzdar. Barlyq aýdan, qalalarda kóp páterli turǵyn úılerdiń ishki jylý jelileriniń daıyndyǵyn qamtamasyz etińizder. Jańa jylytý maýsymyn úzdiksiz ótkizý daıyndyq jumystarynyń ýaqytyly, sapaly júrgizilýine tikeleı baılanysty ekenin umytpańyzdar», – dedi oblys ákiminiń birinshi orynbasary Lázzat Turlashov jıyndy qorytyndylap.