Májilis depýtaty Maqsat Tolyqbaı ánshilerdiń fonogrammen án aıtýyna qarsy shyqty.
Depýtat konsertke bılet alǵan tyńdarmannnyń aldynda ánshiler jandy daýysta án shyrqaýy tıis dep esepteıdi, dep habarlaıdy aqshamnews.kz.
Bilesizder, bizdegi qoldanystaǵy zań boıynsha ánshiler fonogramny paıdalanǵan kezde konsert uıymdastyrýshylary ol týraly kórermenderdi habardar etýge mindetti. Búgingi ánshi aýzyn jybyrlatyp, fonogrammen aıtady dep aıtylýy tıis. Biraq ol ereje bizde múldem jumys istemeıdi. Sondyqtan biz bul zań jobasyna fonogramny paıdalanýǵa tyıym salý týraly túzetýler engizýdi usyndyq. Biraq mınıstrlik muny qoldap otyrǵan joq. Aıtatyn syltaý kóp. Óńirlerde tehnıkalyq quraldardyń 70 paıyzy tozǵan deıdi. Biraq biz normany taǵy da jeńildetip, mynadaı mehanızm usyndyq, - deıdi depýtat.
Alaıda mınıstrlik tarapynan bul usynys ta qoldaý tappaǵan.
Konsert zaly tehnıkalyq quraldarmen tolyq qamtamasyz etilse, fonogramny paıdalanýǵa tyıym salynady dedik. Biraq bul norma da ótken joq. Men bir ánshiniń ánin tyńdaǵym kelse, YouTube-tan da tyńdaı alamyn, dıskisin satyp alyp, kóligimde otyryp tyńdaımyn. Biraq aqshasyn tólep, konsertke barǵan kórermen nege fonogrammen tyńdaýy tıis? Bul talap oryndy dep oılaımyz. Ekinshiden, bizge aıtylyp otyrǵan taǵy bir syltaý – bilikti dybys rejıserleri jetispeıdi deıdi. Endi suranys bolmaǵandyqtan, árıne, jetispeıdi. Fonogramny alyp tastasa, eń qymbat gonorardy dybys rejıserlary alar edi. Bul da qıyn degen soń jeńil norma usyndyq. Eger oryn jetkilikti túrde jabdyqtalmaǵan jáne konsertterge beıidelmegen bolsa, onda aýdıtorıa habardar ete otyryp, fonogramǵa ruqsat etiledi dedik. Biraq buǵan da qarsy bolyp otyrsyzdar, - deıdi Maqsat Tolyqbaı.