Búginge deıin maımyl sheshegi 75 memlekette tirkelgen.
Dúnıejúzilik densaýlyq saqtaý uıymynyń basshysy Tedros Gebreıesýs maımyl sheshegin halyqaralyq aýqymdaǵy tótenshe jaǵdaı dep jarıalady, dep habarlaıdy Almaty-akshamy.kz
DDSU basshysynyń aıtýynsha, maımyl shesheginen týyndaıtyn aýrýdyń qateri Eýropany qospaǵanda, búkil álemde shekteýli deńgeıde qalyp otyr.
«Men maımyl shesheginiń jahandyq taraýy densaýlyq saqtaý salasynda halyqaralyq mánge ıe apatty jaǵdaıdy týdyryp otyr degen sheshimge keldim. Eýropada ol joǵary bolyp otyr. Uıymnyń qolynda aýrýdyń taralýyn toqtalyp, baqylaýda ustaý úshin qajetti quraldardyń bári bar. Osy oraıda, barlyq memleketterdiń sáıkes uıymdarmen jumys istegeni asa mańyzdy», - dedi Tedros Gebreıesýs.
DDSU-nyń sońǵy málimetterine súıensek, mamyr aıyna bastap búginge deıin maımyl sheshegi 75 memlekette tirkelgen. Barlyǵy 16 myń adam aýyrǵan, olardyń arasynda balalar da bar. Bes adam sheshekten qaıtys boldy.