Májilis depýtaty, sportshy Dáýlet Turlyhanov ulynyń is-áreketine qatysty Feısbýktegi paraqshasynda pikir bildirdi.
Sońǵy bes aıda áleýmettik jelilerde ulyna qatysty jaǵdaıǵa baılanysty kóp aqparat tarap jatqanyn jetkizdi, dep Almaty-akshamy.kz.
«Bul jaǵdaıdyń bolǵany ras. Alaıda ony qoǵamdyq ortaǵa qaıta-qaıta sala berýdiń jóni joq dep esepteımin. Jaǵdaı oryn alǵanda, óz pikirimdi ashyq aıtqanmyn. Barlyq jaǵdaı zań júzinde sheshilýi kerek degenmin. Qazirgi kezde qoǵamdyq ortada ulymnyń bir qateliginen basqa qanshama aıtylatyn ózekti máseleler bar emes pe?! Ulyma baılanysty jaǵdaıdyń qoǵamda úlken aqparatqa aınalǵany túsiniksiz. Aqparattar shyǵyp jatyr, osy arqyly haıp jınap, qoǵamda reıtıńin ósiremin degender óz maqsatyna jetken shyǵar. Endi bul máseleni osy jerden doǵarǵanymyz durys», - dep jazdy Dáýlet Turlyhanov.
Halyq qalaýlysy ulynyń áli jas, onyń jasaǵany dızertırlik áreket emes ekenin ashyq jazdy.
«Bylaısha aıtqanda, balalyqqa salynyp «samovolkaǵa» shyǵyp ketkeni. Men ulymnyń Qazaqstan Qarýly kúshteriniń sapynda jaýynger bolyp júrgenin maqtan etemin. Ol jastyqtyń jalynymen qatelik jasaǵany túsinikti. Ǵashyq bolyp júrgen bala, súıgen qyzy kelgen eken, soǵan shyǵyp ketken. Bul endi jastyq sezim, mahabbat sezimi. Árıne, men ony aqtamaımyn. Qaı ata-ana óziniń balasyn jaman bolsyn deıdi?!», - dedi ol.
Depýtat balasyna qazir psıhologıalyq aýyrtpalyq túsip jatqanyna da toqtaldy.
«Qudaı saqtasyn, osy jaǵdaı balamnyń taǵdyryn tálkekke salyp, qandaı da bir oqys áreketke barýyna sebep bolsa, men de óz tarapymnan qarap qalmaımyn, qoldanystaǵy zań sheńberinde áreket etemin», - dedi sportshy.
Ulynyń jastyqqa berilip, jibergen kemshiligi onyń halyq aldyndaǵy abyroıyn túsire almaıtynyn jazdy.
«Búgingi kúndegi abyroıym - orasan eńbektiń arqasynda kelgen. Al meniń ulymmen bolǵan bir ǵana jaǵdaı – halyq aldyndaǵy abyroıymdy túsire almaıdy. Qoǵamdy dúrliktirip, aqparat taratyp júrgender osyny túsinse eken deımin», - dedi ol qazaqstandyqtarǵa jasaǵan úndeýinde.
Sondaı-aq, halyq qalaýlysy ulynyń isine qatysty óz oıyn bildirdi.
«Taǵy da qaıtalap aıtqym keledi, ulyma qatysty tergeý amaldary júrgizilip jatyr. Bári zań sheńberinde sheshiletin bolady. Túsinistikpen qaraýlaryńyzdy suraımyn», -dedi Dáýlet Turlyhanov úndeýinde.
R/S: Sot Nurasyl Bolatty ÁQBtK-niń 652-babynyń 6-bóliginde kózdelgen ákimshilik quqyq buzýshylyqty jasaǵany úshin kináli dep tanydy. Ol 15 táýlikke qamaýǵa alyndy.
Sot úkimi zańdy kúshine engen joq.