Búginde Qazaqstan men Qytaı arasyndaǵy dostyq, tatýlyq jáne uzaq merzimdi strategıalyq áriptestik qarym-qatynas belsendi damyp keledi. Prezıdent Qasym-Jomart Toqaev QHR-ǵa resmı sapary aıasynda Sı Szınpınmen kezdesip, 2022 jyly eki elge teńdeı mádenı ortalyqtar qurý týraly kelisimge qol jetkizdi. Elder arasyndaǵy mádenı dıalogty damytýdaǵy bul mańyzdy qadam mádenıet pen óner salasyndaǵy yntymaqtastyqty nyǵaıtady, dep habarlaıdy almaty-akshamy.kz QR Mádenıet jáne aqparat mınıstrliginiń baspasóz qyzmetine silteme jasap.
QR Mádenıet jáne aqparat mınıstri Aıda Balaeva Beıjińge jumys sapary aıasynda QHR Mádenıet jáne týrızm mınıstri Sýn Elımen kezdesip, atalmysh jobany júzege asyrý máselelerin talqylady.
Ortalyq qyzmetiniń negizgi baǵyty mýzeı jáne kitaphana isi, mýzyka jáne kıno óneri, til úıretý t.b. bolady dep josparlanýda.
«Qytaı men Qazaqstan - uzaq ýaqyt boıy strategıalyq odaqtas, sondaı-aq barlyq sala boıynsha tyǵyz qarym-qatynas ornatqan seriktes. Búgingi kezdesý eki el arasyndaǵy tatýlyqty odan ári nyǵaıtýǵa jáne ózara tıimdi yntymaqtastyqty damytýǵa berik negiz boldy. Biz óz tarapymyzdan ortalyqtyń ashylýyna qatysty barlyq máselelerdi jedel sheshýde barynsha qoldaý kórsetemiz», - dedi Sýn Elı.
İssapar barysynda qazaqstandyq tarap Qytaıdaǵy Qazaqstan ortalyǵynyń mazmundyq tujyrymdamasyn ázirlep, ǵımarat tańdaýǵa qatysty uıymdastyrýshylyq máseleler men quqyqtyq aspektilerin pysyqtady.
Sonymen qatar mınıstrler eki vedomstvonyń odan ári baılanysyn arttyrý máselelerin talqylady.
Eki jaq birlesken jumysty kúsheıtý úshin mádenıet salasyndaǵy kelisimderge qol qoıý arqyly yntymaqtastyqty nyǵaıtý máselesin pysyqtady. Atap aıtsaq, teatr jáne konserttik ujymdar arasyndaǵy gastrólder, kórmeler men klasıkalyq ádebıet týyndylaryn ózara aýdarý, basyp shyǵarý máseleleri jáne basqa da jobalar bar.
Aıda Balaeva Qazaqstan úshin Qytaıdan muraǵat materıaldary men mádenı murany qaıtarýdyń mańyzyn atap ótip, sırk óneri men horeografıa salasyndaǵy stýdentter men oqytýshylarǵa arnalǵan QHR mamandarynyń sheberlik synyptaryn ótkizý, kınematografıa boıynsha granttar bólý, mýzeı isi salasynda tájirıbe almasý jáne tarıhı-mádenı murany saqtaý, restavrasıalaý sekildi máseleler de ózekti ekenin tilge tıek etti.
QHR radıo jáne teledıdar isteri jónindegi Memlekettik basqarma basshysy Sao Shýmınmen kezdesý de mańyzdy boldy.
«Bizdiń Memleket basshylarynyń arqasynda Qazaqstan-Qytaı seriktestigi barlyq salalarda jaqsy qarqynmen damyp keledi. Eki eldiń telearnalary birqatar birlesken jobalardy júzege asyrdy. Biz jańa formatta kontent jasaý arqyly mıkroserıaldar men elder týraly beınerolıkter túsirip, olardy teledıdarǵa taratý baǵytyndaǵy jumysty kúsheıtýdi usynamyz», — dedi Sao Shýmın.
Aıda Balaeva QHR telearnalarynda kórkem, derekti, anımasıalyq fılmderdiń rotasıalanýyna qoldaý surady, sonymen qatar birlesken serıal túsirýge, Qazaqstannyń kórikti jerleri men mádenı nysandary týraly rolıkter túsirýge kómektesýge ázir ekenin aıtty.
Sondaı-aq mınıstr habar taratý aýqymy boıynsha álemdegi eń iri BAQ-ta kórsetiletin Qytaıdyń televızıalyq shoýlaryna otandyq mádenıet ókilderiniń qatysýyna erekshe qyzyǵýshylyq tanytatynyn atap ótti.
Aıta keteıik, eki jaq BAQ jáne aqparat, tele jáne radıo habarlaryn taratý men aýdıovızýal ónim máseleleri boıynsha ózara baılanys týraly kelisim jobalaryn qarastyrady.
Mınıstr QHR «Global China Media Corporation» iri medıa korporasıasynyń bas dırektory Shen Haısúnmen kezdesý barysynda, qytaılyq tarap eki eldiń mádenı murasy men mádenı qundylyqtaryn nasıhattaýǵa baǵyttalǵan derekti fılmder shyǵarý týraly kelisim jasaýdy usyndy.
Naýryz meıramy qarsańynda qytaılyq radıostansıalarda kúıler rotasıalanatyn bolady.
QHR Ulttar isteri jónindegi Memlekettik komıtet tóraǵasy Pan Iýemen kezdesýde Aıda Balaeva Qazaqstan tarıhynda alǵash ret kópultty «Birlik» án-bı ansambli qurylǵanyn sóz etti.
Tájirıbe almasý maqsatynda mınıstr ansámbldiń Beıjińge gastróldik saparyn uıymdastyrý, sondaı-aq QHR Memlekettik komıteti janynda jumys isteıtin túrli ulttar men az ulttar ansamblderi kórkemdik jetekshileriniń master-klastaryn ótkizý múmkindigin qarastyrýdy usyndy.
Mınıstr Beıjińge jumys saparynyń sońynda Qytaı Úlken teatrynyń dırektory Van Nınmen kezdesti, taraptar eki eldiń teatr ónerin damytý máselelerin talqylady.
Teatrda qazaqstandyq delegasıa «Úlken qyzyl arman» qoıylymyn tamashalap, bıik estetıkalyq deńgeıde qoıylǵan bı dramasynan erekshe áser aldy.