QR Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Asqarbek Ertaev Kóshi-qon máseleleri boıynsha Qazaqstan-Latvıa birlesken konsýltasıalaryna qatysty, dep habarlaıdy almaty-akshamy.kz
Taraptar Qazaqstan men Eýroodaq arasyndaǵy vızalyq rejımdi ońaılatý, vızaǵa qujattar berý jáne osy úderistegi deldaldardyń róli, Latvıada jumys isteıtin Qazaqstan azamattarynyń quqyqtaryn qorǵaý máselelerin qarastyrdy.
Eńbek salasyndaǵy ózara is-qımyldy jaqsartý jáne ekijaqty yntymaqtastyq sheńberinde zańdy eńbek kóshi-qonyn qamtamasyz etý maqsatynda Latvıa Respýblıkasyndaǵy qazaqstandyq eńbekshilerdiń quqyqtaryn qorǵaý jáne olardyń jumysqa ornalasýy úshin jaǵdaı jasaýǵa baǵyttalǵan úkimetaralyq kelisim jasasý máseleleri talqylandy. Mundaı kelisimdi jasasý qazaqstandyqtarǵa Latvıada eńbek qyzmetin zańdy túrde júzege asyrýǵa múmkindik beredi.
Taıaý ýaqytta Eńbekmıniniń Kóshi-qon komıteti Latvıa tarapyna úkimetaralyq kelisimniń jobasyn qaraýǵa jiberetin bolady.
Kóshi-qon máseleleri boıynsha kelissózder men konsýltasıalar jalǵasatyn bolady.