Mádenıet jáne aqparat mınıstrligi men Qazaqstan Jazýshylar odaǵynyń birlesken jobalary tanystyryldy

Almatydaǵy «Dostyq» úıinde QR Mádenıet jáne aqparat mınıstrligi men Qazaqstan Jazýshylar odaǵy arasyndaǵy áriptestik aıasynda júzege asyrylyp jatqan jobalardyń tanystyrylymy ótti. Jıynnyń ashylýynda Mádenıet jáne aqparat mınıstri Aıda Balaevanyń jobalardyń júzege asýyna sáttilik tilegen quttyqtaý haty oqyldy, dep habarlaıdy aqshamnews.kz.

Jazýshylar odaǵynyń tóraǵasy Mereke Qulkenov qalamgerler qaýymyna memleket tarapynan kórsetilip jatqan qoldaýǵa rızashylyǵyn bildirdi. Sondaı-aq, jıynǵa sebep bolyp otyrǵan «TMD elderiniń arhıvterindegi Qazaqstandyq jazýshylardyń zertteý jumystary», «Jazýshylardyń ádebı sheberlik mektebi», «Jańa Qazaqstannyń ádebı-tanymdyq panoramasy», «Jazýshylar odaǵyna úmitker» atty birlesken jobalarǵa toqtalyp ótti.

Jıyn barysynda jobalardyń mazmuny men maqsaty keńinen tanystyrylyp, ótkizý joldary týraly aıtyldy.

Jıyn sońynda Qazaqstan Jazýshylar odaǵyna qabyldanǵan jańa múshelerge múshelik bıletter tapsyryldy.

Aıta keteıik, bıyl Qazaqstan Jazýshylar odaǵynyń qurylǵanyna – 90 jyl. Búginde qoǵamdyq uıym 1000-nan asa avtordy biriktiredi.