Bokstan qyzdar quramasynyń bapkeri Angelına Lýkastyń aıyptaýlaryna jaýap berdi
Bokstan Qazaqstan qyzdar quramasynyń bas bapkeri Shamıl Safıýllın kásipqoı boksshy Angelına Lýkastyń aıyptaýlaryna jaýap berdi, dep habarlaıdy almaty-akshamy.kz.
Este bolsa, osydan birer kún buryn Lýkas jýrnalıs Dınara Sátjanǵa suhbat berip, qyzdar quramasynda oryndardyń ádiletsiz bólinetinin, bas bapkerdiń kóp jaıtty eleýsiz qaldyratynyn aıtqan bolatyn.
«Lýkas Shekerbekovanyń álem chempıonaty men Azıa oıyndaryna qandaı prınsıp boıynsha barǵanyn surap otyr. Aıtaıyn. Ótken jyly bizde Spartakıadada irikteý boldy. Ol kezde Jaına 54 kelide birinshi oryn alyp, Azıa oıyndarynda el namysyn qorǵaýǵa múmkindik aldy. Angelına da osy salmaqta qatysyp, Balaýsa Muzdymanǵa jeńilip qaldy. Sondyqtan, ony biz Azıa oıyndaryna aparǵan joqpyz», - dedi Sh.Safıýllın.
Kúni keshe Italıadaǵy lısenzıalyq týrnırde qyzdar quramasy túgel jeńilip, Olımpıadaǵa joldama ala almaı qaıtqan edi. Bas bapker Taılandqa qaıta irikteý júrgizetinin aıtty. Alaıda, Angelına Lýkastyń bul týrnırge baratyn múmkindigi nólge teń.
«Biz ony qazir irikteýge shaqyra almaımyz. Óıtkeni, ol bizdiń quramamen birge jattyqqan joq, oqý-jattyǵý jıynynan ótpedi, úlken jarystarda óner kórsetýge qajetti júktemeni alǵan joq. Biz bes salmaq boıynsha 21-22 sáýirde sparrıng ótkizemiz. Jaına Shekerbekova Spartakıadada ekinshi oryn alǵan Anel Saqyshpen jekpe-jek ótkizedi», - dedi bas bapker.
Aıta keteıik, qazir Qazaqstannyń qyzdar quramasynda Olımpıadaǵa tek bir ǵana joldama bar.